Membru Deputadu FRETILIN, David Dias Ximenes “Mandati”. Imajen/Egas Cristovão.

DILI, 10 marsu 2021 (TATOLI)—Deputadu Bankada Frente Revolusionária Timor-Leste Independente (FRETILIN), David Dias Ximenes ‘Mandati’, husu Estadu Timor-Leste ejize ba Indonézia atu hatudu Nicolau Lobato nia ruin no restu mortál sira seluk nian.

Notísia Relevante: Veteranu sira husu Governu buka-tuir PR Nicolau Lobato nia ruin

Razaun Mandati husu tanba militár Indonézia ne’ebé uluk hala’o operasaun iha Timor maioria ho idade katuas ona.

Deputadu Bankada FRETILIN ne’e hateten, Prabowo ne’ebé mai ihaTimor ho tinan liu 20 no Komandante Batallaun 744 katuas ona no balun mate ona.

“Karik bele, sira mós bele hatudu ita-nia ema sira, apartir Nicolau Lobato, Bilear, Mauhudo, Sabalai, Daitula no ema sira iha 10 juñu Marabia, tuir mai 1983 nian, depois 12 novembru nian. Karik bele hatudu fatin para ita ba foti nune’e ita haloot ita-nia ema, tanba sira la’ós halo buat aat ruma mak sira mate, ne’ebé ohin loron ita haluha tiha de’it ne’e,” Deputadu Mandati levanta liuhosi plenária, tersa ne’e.

“Tanba saida mak ha’u ansia, keta halo COVID-19 ne’e akontese ba sira entaun sira laiha, aban bainrua sira bele dehan la hatene ona tanba ema sira-ne’ebé halo operasaun iha Timor ne’e mate ona,” nia fundamenta.

Nia dehan, parte Indonézia mai vizita hela sira-nia maluk ne’ebé mate iha funu tanba ne’e Indonézia mós tenke hatudu Timoroan ne’ebé mate ona.

Mandati rona Governu Timor-Leste esforsu hela maibé esforsu ne’e seidauk másimu tanba ne’e presiza esforsa liután.

“Ha’u konsege ko’alia ho Embaixadór Indonézia ninian, nia mós buka-tuir hela. Ha’u fó tán dadus ba nia, pelumenus ita-nia Governu halo esforsu másimu uitoan, selae ita la hetan duni,” Deputadu Mandati fó hanoin ba Governu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here