Ilustrasaun labele fuma

DILI, 29 novembru 2021 (TATOLI)— Hahú hosi fulan-outubru to’o novembru, Sentru Saúde Bairru Formasa liuhosi Sentru Hapara Fuma halo ona konsulta ba fumadór hamutuk 140-resin atu hapara fuma tabaku.

“Ita hahú lansamentu ba sentru hapara fuma iha loron 19 outubru. Nune’e hahú loron 22 outubru to’o agora ami rejista ona ema hamutuk 144, hosi númeru ne’e fumadór ne’ebé hetan aimoruk hamutuk 107 no sira ne’ebé mak follow up mai fila-fali hamutuk 26 inklui feto na’in-rua. No sira ne’ebé mak mai tuir akonselamentu de’it na’in-33,’’ Enfermeiru Jerál iha Sentru Hapara Fuma, Joanico Ramos hateten ba Agência TATOLI iha nia knaar fatin,Bairru formoza, segunda ne’e.

Fumadór ne’e deside an anti tabaku liuhosi konsumu aimoruk no daudaun follow up na’in-26 nia kondisaun di’ak tanba diferente tebes ho antes sira fuma.

“Sira-nia tratamentu ne’e ami fó uluk semana rua, depois semana rua hotu mai filafali follow up to’o fulan tolu mak iha mudansa ita haree hapara aimoruk no para sigarru,” nia dehan.

Estoke aimoruk sira fumadór sei sufiente hela tanba aimoruk ne’e iha oin haat, ho tipu rua hanesan aimoruk nicotine Gum mak 2mg no 4mg ne’ebé nata deit ida seluk mak Patch 4mg no 21mg mak taka de’it iha isin.

“Aimoruk sira ne’ebé mak ami fó depende ba sira nia fuma se sira loron ida mak sira fuma hotu masu haat to’o lima ne’e ami fó aimoruk 21mg nicotine,’’ nia akresenta.

Daudaun, Sentru Hapara Fuma halo ona kordenasaun ho Diresaun Servisu Saúde Ermera atu kria mós sentru reabilitasaun ida no mós planu atu kria hotu ba munisípiu sira seluk.

Notísia Relevante: MS lansa sentru hapara fuma prevene moras la hada’et

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here