Ministra Saúde, Odete Maria Freitas Belo no Reprezentante Organizasaun Mundiál Saúde (OMS) iha Timor-Leste, Arvind Mathur, hala'o lansamentu ba uma sentru hapara fuma ho liña kontaktu 11113. Iha Sentru Saúde Formoza Dili, tersa (19/10). Imajen Tatoli/Francisco Sony

DILI, 19 outubru 2021 (TATOLI)—Governu liuhosi Ministériu Saúde, tersa ne’e lansa sentru hapara fuma atu presta serbisu ba ema ne’ebé hakarak hapara fuma hodi prevene moras la hada’et iha Timor-Leste

Biban ne’e, Ministra Saúde, Odete Maria Freitas Belo, hateten, sentru ida ne’e estabelese ho objetivu presta serbisu ba ema-sira ne’ebé hakarak hapara fuma.

“Governu hanoin atu sidadaun hapara fuma tabaku iha tinan 2016 tanba tuir rezultadu peskiza iha tinan 2014 hatudu ema fuma 70% hosi kedas husi labarik idade 13 ba leten. Tanba fuma sai problema ida ba nasaun hanesan liga ho sosiál no ekonomia ita-nian,” Ministra Saúde, hateten iha seremonia lansamentu sentru hapara fuma iha sentru Formoza.

Sentru ida-ne’e ho objetivu seluk maka hapara fuma, tanba fuma la’ós kontribui de’it ba ema ne’ebé hapara fuma ninia saúde, maibé hanoin katak iha ligasaun ba iha ekonomia família.

MS estabelese sentru hapara fuma atu bele prevene moras la hada’et liuliu atu hadook ema hosi fuma.

“Ita nia sentru ne’e sei halo akonselamentu hodi ajuda maluk sira ne’ebé hakarak atu hadook an hosi fuma,” Governante ne’e akresenta.

Iha biban hanesan, Diretór Nasionál Autoridade Aduaneira (AA/Alfándega), Julião José Ximenes, hateten, durante ne’e Alfandega sebisu hamutuk ho Ministériu Saúde implementa ona Dekretu-Lei númeru 14/2016, kona-bá Rejime Kontrolu Tabaku tanba lei ida ne’e fó vantajen ba Alfandega atubele halo ninia kontrolu iha importasaun tabaku liuhusi meiu terrestre, portu no aeroportu.

“Ita nian importador hakarak halo importasaun tabaku, tenke submete uluk sira nia pedidu ba saúde, antes loron 30, hafoin ministériu saúde aprova maka sira halo importasaun,” Diretór Nasionál ne’e informa.

Entretantu, Diretór Operasaun Autoridade Inspesaun no Fiskalizasaun Atividade Ekonómika no Sanitária (AIFAESA), Gabriel da Silva, afirma daudaun serbisu hamutuk ho Polisia Nasionál Timor-Leste (PNTL) halo inspesaun no operasaun ba sigaru ilisitu sira ne’ebé hatama ilegál no faan iha merkaduria.

“Ita haree katak tabaku sira ne’e kontinua buras iha ita-nia rain, maski ita nia lei bandu hatama sigaru ilísitu sira atu sirkula iha merkadu Timor-Leste,” Diretór Operasaun ne’e afirma.

AIFAESA husu ba operador ekonomia sira liuliu ba negósiante tabaku ilísitiu iha merkadu tradisionál atu hapara negosiu ne’e.

Aleinde ne’e, Reprezentante Organizasaun Mundiál Saúde (OMS) iha Timor-Leste, Arvind Mathur no Ministra Saúde, Odete Maria Freitas Belo, troka nota entedimentu hodi apoiu Ministériu Saúde iha programa hapara fuma no lansa mós liña kontaktu 11113.

Governu liuhosi Ministériu Saúde koloka ona profisionál saúde na’in-lima, kompostu médiku ida, enfermeira rua no saúde públika rua iha sentru hapara fuma hodi presta serbisu ba públiku.

Notísia relevante:  Kada Tinan, Fumadór Sira Mate 600.000

Jornalista : Felicidade Ximenes

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here