Desportu halai taru kuda hodi komemora loron proklamasaun independénsia ba dala-46. Imajen Tatoli/Celestina Teles.

COVALIMA, 27 novembru 2021 (TATOLI)—Vise-Ministru Edukasaun Juventude no Desportu, António Guterres, hateten kuda halai taru hanesan kultura hosi munisípiu Covalima tanba ne’e tenke kontinua promove kultura refere.

Notísia Refere: Selebra loron independénsia, Covalima sei promove kompetisaun ‘kuda halai taru’

Ohin, ita realiza atividade importante ida atu hatudu identidade úniku Covalima (Suai) ni’an, ita hanaran kurida kuda ka kuda halai taru,” Vise-Ministru MEJD, António Guterres, hato’o liuhosi nia diskursu iha Suai Loro, Covalima, sesta ne’e. 

Nia hatutan, iha tempu Rui Lopes nia tempu, Covalima kuñesidu ho kurida kuda tanba ne’e presiza atu kontinua promove. 

“Ha’u hatene uluk iha Avó Rui Lopes nia tempu, Covalima kuñesidu ho halai taru kuda. Ita haree kuda halai taru, ita seidauk rona hosi munisípiu seluk manan só Suai mak manan hela de’it,” nia dehan.  

Tanba ne’e, Governandte ne’e dehan, nia parte sei informa ba Sekretáriu Estadu Juventude no Desportu (MEJD) atu kontinua tau prioridade ba kuda halai taru ne’ebè mak sai hanesan kultura Covalima no Timor-Leste nian. 

“Ita foin primeiru, Governu liuhosi ministériu edukasaun realiza atividade refere ba futuru. Ha’u sei informa ba Sekretáriu Estadu Juventude no Desportu atu tau prioridade ba atividade kuda halai taru iha Covalima, no bainhira komora loron nasionál sira tenke kontinua atividade halai taru kuda hodi promove kultura Covalima presiza hatudu,” nia dehan. 

Administradór Munisípiu Covalima, Francisco de Andrade, reforsa katak iha komemorasaun loron proklamasaun independénsia 28 Novembru ba tinan ne’e, Covalima realiza atividade kuda halai taru tanba kultura ida-ne’e atu lakon ona maibé autoridade Covalima hamors fali. 

“Molok Timor-Leste ukun rasik an Covalima kuñesidu maibé hafoin ukun rasik an kuda ne’e kuaze Suai tomak laiha ona, iha foho mak iha, entaun sedu ka tarde Desportu ida-ne’e atu lakon ona,” nia informa. 

Tanba ne’e, komisaun organizadora sira deside realiza atividade ida-ne’e tenke kontinua hala’o hanesan desportu tradisionál ida, tanba kuda halai taru ne’e kultura hosi Covalima hodi kontinua promove iha teritóriu nasionál. 

Xefe Sesaun Kuda Halai Taru, Castro Amaral, hateten sesaun ida-ne’e fó prémiu ba sira-ne’ebè mak sai vensedór halai taru kuda.

“Ba vensedór sira ami prepara prémiu osan de’it no ami mós kontente komemora loron Nasionàl ida ho halai taru kuda,” nia dehan.

Prémiu ne’ebè komisaun organizadora sira deside mak primeiru lugar loloos sei hetan osan $400 maibé tanba $200 baku tiha ba tasa nian entaun simu de’it $200, segundu lugar sei simu $350, terseiru lugar $300 no kuartu lugar hetan $250.

Jornalsita : Celestina Teles

Editór       : Cancio Ximenes. 

PUBLISIDADEiklan

HAKEREK NO HATÁN

Please enter your comment!
Please enter your name here