Diretór Inspesaun Jerál-MESSK, Higino Alves. Imajen TATOLI/Francisco Sony

DILI, 26 novembru 2021 (TATOLI)—Instituisaun Ensinu Superiór Públiku no Privadu (IESPP) hamutuk 18 sei devolve osaninzensaun propina millaun $1-resin, ne’ebé universidade sira la konsege reembolsa ba estudante sira tanba mosu mudansa iha implementasaun.

Ministériu Finansa transfere ba universidade 18 hamutuk $5.617.862,50 ba inzensaun propina estudante 64.466.

“Universidade sira ezekuta de’it $2.756.947 ba estudante 51.178 tanba estudante na’in-7.960 lakon direitu, ho nune’e metade osan $1.496,536 tenke fila ba kofre Estadu,” Diretór Inspesaun Jerál Ministériu Ensinu Superior Siénsia no Kultura (MESSK), Higino Alves, informa iha ninia knaar fatin, Colmera, sesta ne’e.

Antes ne’e, universidade sira submete relatóriu semestre dahuluk tinan letivu 2021 ba MESSK, ho durasaun tempu loron 90 ne’e to’o loron 31 outubru (universidade balun submete tarde) hodi kontinua pagamentu semestre daruak.

“Ita seidauk konsidera relatóriu ne’ebé universidade 18 submete ona mai ministériu iha faze finál tanba sei verifika no fiskaliza dadus. Ne’e duni ita sei konsidera relatóriu ne’e provizóriu hela,” nia akresenta.

Notísia relevante: Estudante 8.899 hosi universidade 14 lakon direitu izensaun propina

Aleinde ne’e, iha universidade ne’ebé hatama relatóriu tarde no iha fallansu balun ne’ebé presiza hadi’a.

“Ezemplu kiik ida, Universidade Nasionál Timor-Lorosa’e (UNTL) hatama ninia relatóriu ikus liu iha loron 19 novembru liubá, maibé hatudu lakuna lubuk ida. Proposta inisiál ne’ebé submete la han malu ho lista pagamentu, ne’ebé iha lista ba estudante hosi kursu kímika hatudu pagamentu ba estudante 30 maibé ezekusaun $5 de’it,” nia esplika.

Nune’e, bainhira parte kompetente husu esplikasaun kona-ba relatóriu no proposta, parte UNTL fó razaun katak bainhira aprezenta proposta mai MESSK estudante sira livre teoria.

“Bainhira prosesu pagamentu realiza ona, sira livre ona, entaun hetan de’it $5, ne’ebé $25 tenke devolve ba kofre Estadu,” Diretór Inspesaun Jerál tenik.

Iha sorin seluk, parte ministériu seidauk identifika hotu estudante livre teoria.

“Bainhira ramata ona, ami sei fó sai ninia rezultadu orsamentu hira mak tenke devolve filafali. Ami bolu sira atu hadi’a kestaun ne’e,” Higino Alves dehan.

Tuir diploma ministeriál númeru 34/2021 19 maiu, kona-ba prosedimentu inzensaun pagamentu propina hosi parte estudante ensinu Superiór nasionál, mensiona kada estudante benefisiáriu sei hetan izensaun propina $150 ba semestre ida ho prosedimentu ba estudante ne’ebé regularmente inskritu ka ativu iha tinan letivu 2021, iha kursu titulár lisensa, iha instituisaun ensinu superiór públika no privada akreditada, enkuantu ba estudante ne’ebé hetan ona bolsa estudu sei la sai benefisiáriu programa ne’e.

Aleinde ne’e, instituisaun ensinu Superiór ne’ebé sai befisiáriu ba programa tenke reembolsa ba estudante inskritu, valór propina to’o montante másimu $150.

Jornalista : Tomé Amado    

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here