Universidade Nasionál Timor-Lorosa’e (UNTL). Imajen TATOLI/Francisco Sony

DILI, 11 novembru 2021 (TATOLI)–Estudante 8.899 hosi universidade públiku no privadu akreditadu 14 lakon direitu izensaun propina tanba nunka halo konfirmasaun bainhira universidade implementa programa ne’e.

Tuir Inspetór Jerál Ministériu Ensinu Superiór Siénsia no Kultura (MESSK), Higino Alves, daudaun ne’e hahú ona verifikasaun ba instituisaun sira tanba data ne’ebé ministériu fó ramata ona iha loron 10 novembru.

“Tanba ne’e, tempu ona atu halo verifika hodi haree sira-nia ezekusaun orsamentu ba izensaun propina ne’e la’o oinsá,” Inspetór Jerál MESSK hateten iha resintu Parlamentu Nasionál, kinta ne’e.

Antes ne’e, iha loron 14 no 15 jullu, Ministériu Finansa (MF) transfere verba ho montante millaun $5,6 ba konta universidade 18, hodi realiza izensaun pagamentu propina ba estudante hamutuk 64.619, durante loron 90 nia laran, hahú loron 16 jullu to’o 16 outubru.

Nune’e, hafoin universidade reembolsa direita verba ba estudante sira liuhosi izensaun propina, iha loron 15 nia laran tenke halo relatóriu ba MESSK, ne’ebé bele aprezenta hahú loron 15 to’o 30 outubru.

Maski nune’e, tuir Inspetór Jerál, parte ministériu foin mak simu dadus hosi universidade 14 ho totál estudante hamutuk 23.959, ne’ebé falta dadus hosi Universidade da Paz (UNPAZ), Universidade Nacional Timor Lorosa’e (UNTL), Universidade Dili (UNDIL), Universidade Oriental Timor Lorosa’e (UNITAL), ne’ebé to’o agora seidauk submete dadus.

Notísia relevante: MESKK hein relatóriu universidade molok realiza izensaun propina semestre daruak

Enkuantu, bazeia ba relatóriu ezekusaun ne’ebé MESSK simu, hatudu katak instituisaun ensinu superiór 14 la konsege ezekuta fundu ho di’ak.

“Hosi totál estudante 23.959 ne’ebé rejista, iha estudante 15.060 de’it mak asesu fundu ne’e, enkuantu estudante 8.899 lakon direitu ba faze primeiru. Signifika Instituisaun Ensinu Superiór sira konsege ezekuta $1.910.844 no metade $1.106.770 sei filafali ba kofre Estadu,” nia dehan.

Iha fatin hanesan, Vise-Reitór Institutu Superiór Cristal (ISC), Jacinto de Oliveira Junior, informa, parte universidade simu fundu hosi MESSK hamutuk $413.005, ne’ebé totál estudante 2.940 mak tama lista izensaun propina, ne’ebé hosi fundu ne’e, ezekuta de’it $279.070 ba estudante 1.922, enkuantu estudante 1.018 lakon direitu, ho nune’e metade fundu $133.935 sei devolve filafali ba MESSK.

“Ba estudante sira ne’ebé mak la konsege hetan sira-nia direitu ba faze dahuluk, ami sei fó avizu ba sira atubele hetan filafali informasaun ba izensaun propina faze daruak, nune’e sira bele mai halo konfirmasaun,” nia akresenta.

Inspetór Jerál MESSK argumenta, esperiénsia iha faze dahuluk sai lisaun boot ba instituisaun atubele prepara-an di’ak liután atubele pasa informasaun ba estudante sira.

“Hahú agora, instituisaun sira prepara ona lista foun ba estudante sira no fó avizu ba sira ne’ebé simu ona iha faze dahuluk atu hakbesik-an filafali hodi hetan fali apoiu ba faze daruak,” Higino Alves fó hanoin.

Total fundus $3.017.623 ne’ebé MESSK transfere ba Instituisaun Ensinu Superiór 14, kompostu hosi Instituto Filosofico Sao Francisco de Sales (IFFS) hamutuk $17.250, Institutu Politékniku Betano Kayrala Xanana Gusmão (IPB-KRXG) $10.578, ISC $413.005,

Instituto de Filosofia e da Teologia (ISFIT) $67.332, Institutu Boaventura Timor-Leste (IBTL) $9.225, Instituto Catholico Para Formacao De Professores (ICFP) $48.300, João Saldanha Institute (JSI) $7.500, Instituto S. João de Brito (ISJB) $46.200, Instituto de Ciências Religiosas (ICR) $36.750, Instituto Ciências da Saúde (ICS) $430,950, Institute of Business (IOB) $576.790, Dili Institute of Technology (DIT) $519.465, no UNITAL $834.280.

Hosi orsamentu ne’ebé MESSK transfere totál ezekusaun ne’ebé instituisaun 14 ezekuta ona hamutuk $1.910.844, ne’ebé IFFS ninia ezekusaun $16.200, IPB-KRXG $9.462, ISC $279.070, ISFIT $64.312, IBTL $5.325, ICFP $45.450, ISJ $7.050, ISJB $46.200, ICR $34.650, ICS $384.600, IOB $394.820, DIT $396.750, no UNITAL $226.955,00.

Tuir diploma ministeriál númeru 34/2021 19 maiu, kona-ba prosedimentu inzensaun pagamentu propina hosi parte estudante ensinu Superiór nasionál, mensiona kada estudante benefisiáriu sei hetan izensaun propina $150 ba semestre ida ho prosedimentu ba estudante ne’ebé regularmente inskritu ka ativu iha tinan letivu 2021, iha kursu titulár lisensa, iha instituisaun ensinu superiór públika no privada akreditada, enkuantu ba estudante ne’ebé hetan ona bolsa estudu sei la sai benefisiáriu programa ne’e.

Aleinde ne’e, instituisaun ensinu Superiór ne’ebé sai befisiáriu ba programa tenke reembolsa ba estudante inskritu, valór propina to’o montante másimu $150.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here