Seremónia lansamentu projetu hasa’e rendimentu liuhosi exportasaun produtu agríkola sustentavél. Imajen/MTKI

DILI,  24 agostu 2021 (TATOLI)-Governu liuhosi Ministru Turizmu, Komérsiu no Indústria (MTKI) no Ministéiriu Agrikultura no Peska (MAP)  halo lansamentu ba projetu hasa’e rendimentu liuhosi exportasaun produtu agríkola sustentavél  hanesan kafé, Cacao, Baunila, pimenta, craviño no temperu.

Lansamentu ne’e hala’o hosi Vise Ministru Komérsiu no Indústria, Domingos Lopes Antunes no Vise-Ministru Agrikultura no Peska, Abílio Xavier de Araújo, no akompaña hosi Embaixadór Nova Zelándia, Philip Hewitt, iha sentru  prosesamentu Kafé Aitalo, iha aldeia Horai-kiik, suku Horai-kiik, postu administrativu Maubisse, munisípiu Ainaro.

“Ha’u lori VIII Governu Konstituisionál, agradese tebes ba Governu Nova Zelándia tanba fó apoiu projetu espesifíku ne’e, ho durasaun tinan-lima ba Kooperativa Kafé Timor (CCT, sigla portugés) ho nia membru sira hotu atu kolabora halo reabilitasaun ba kafé sira hodi hasa’e produsaun no rendimentu,” Vise Ministru Domingos hateten liuhosi nota ne’ebé Agência TATOLI asesu, tersa ne’e.

Governante ne’e dezafia CCT atu moris tuir prinsípiu Kooperativa, hodi nune’e bele organiza moris sustentável liu no la depende ba apoiu externu.

Iha biban ne’e, Vise Ministru Komérsiu no Indústria, Vise-Ministru Agrikultura no Peska, Embaixadór Nova Zelándia no komitiva halo vizita ba fatin reabilitasaun kafé no mós ku’u kafé sira ne’ebé mak reabilita ona iha tinan 2017 ho rezultadu di’ak tebes.

Iha tinan ne’e, CCT sosa ona kafé hosi povu agrikultór tonelada 19.000, kompara tinan rua ba kotuk tonelada 15.000  ho folin kada kilograma $0,36.

CCT hanesan Kooperativa ida ne’ebé harii iha tinan 1994, hamutuk ho nia parseiru National Coperative Bussiness Association (NCBA), ho ninia atividade prinsipál mak halibur kafé orgániku hosi membru sira iha área hanesan Ermera, Liquiçá, Aileu, no Manufahi, hodi prosesa  no hala’o exportasaun ba rai-li’ur.

Nune’e, hosi tinan 1994 to’o agora, CCT iha ona membru uma-kain hamutuk 26.000, ne’ebé iha plantasaun kafé no produtu agríkola seluk hanesan Cacao, Baunilla, Craviño, pimenta no tempeiru iha teritóriu Timor laran. 

Serimónia Lansamentu ne’e partisipa hosi  Administradór Ainaro parseiru dezenvolvimentu, Komandante Polísia Nasionál Timor-Leste (PNTL) Ainaro, Prezidente CCT no nia membru sira, inklui konvidadu sira.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here