Kondisaun uma ne’ebé sofre ba inundasaun ne’ebé akontese iha 04 abríl 2021, iha área Masin-lidun Tasi-tolu. Imajen Tatoli/António Gonçalves.

DILI, 26 novembru 2021 (TATOLI)– Governu Timor-Leste liuhosi Sekretáriu Estadu Protesaun Sivíl, hahú ohin, sesta (25/11), alerta ba komunidade ne’ebé hela iha fatin risku sira atu prepara an  no evakua ba fatin seguru,  tanba fenómenu La Liña ne’ebé sei hamosu udan, anin no laloron boot  komesa ativa ona.

Tuir dadus ikus, hatudu katak família afetadu inundasaun iha loron 04 abríl hamutuk 33.835 iha territóriu tomak, família hamutuk 7.246 mak desloka ba sentru akollimentu 31 no rejista ema mate hamutuk 44.

“Metrolojia no jeofízika mudiál, alerta ona katak fenómenu La Liña hahú ativa ona. Nune’e husu ba komunidade sira ne’ebé hela iha área risku hanesan  tasi no mota ninin no foho lolon atu kuidadu aan no bele prepara an mós atu evakua ba fatin seguru,”  Diretór Jerál  Sekretaria Estadu Protesaun Sivíl (SEPS), Ismael Babo, hateten, ba Agência TATOLI, iha knaar fatin, Caicoli-Dili, sesta ne’e.

Notísia Relevante: SEPS hahú prepara kondisaun hasoru fenómenu La Niña

Daudaun, Governu liuhosi SEPS preparadu ona atubele salva komunidade sira liuhosi meiu evakua ba fatin seguru.

“Husu ba inan-aman-sira atu kontrola oan sira labele ba halimar iha mota bainhira udan, tanba ne’e fasilmente bele lori risku ba sira, tanba esperénsia hatudu ona iha tinan hirak liu ba mota lori labarik sira. Nune’e ita eforsu tomak atu lakohi situasaun ne’e akontese tan,” Diretór ne’e fó hanoin.

Alende ne’e, SEPS mós husu ba komunidade sira atu iha tempu udan no bee sa’e makas tenke hamate eletrisidade hodi prevene insidente ema mate.

SEPS hamutuk ho liña ministerial sira no parseiru internasionál prontu atu apoia komunidade sira iha fatin risku hodi evakua ba fatin seguru.

Meteorolojia Austrália no Internasionál Globál Enso Analysis Cell, alerta ona katak Timor-Leste sai hanesan nasaun ida ne’ebé hetan mós impkatu boot hosi fenómenu La liña.

Fenómenu La Niña nu’udar ecentu klimátiku ho kondisaun anomalia ho tempreatura laloran tasi boot iha Oseanu Pasífiku no aumenta ho mundasan iha sirkulasaun atmósfera, akompaña ho anin no udan boot.

“Ami servisu hamutuk ho operadór sira ne’ebé iha atu fó alerta ba  komunidade sira  hodi prevene aan  hosi La Niña”, nia afirma.

Dadus ikus hosi MAE, relata katak família hamutuk 2.558 maka daudaun hela iha área risku dezastre naturál iha munisípiu Dili, hanesan besik mota, foho-lolon no lagoa ninin.

Notísia Relevante: SEPS kontinua apoia ai-han ba vítima inundasaun iha sentru akollamentu

Jornalista  : Natalino Costa 

Editór         : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here