Estudante Escola Maria Auxiliadora Comoro Dili tinan 12-17 forma hodi simu Vasina PfiZer Covid-19 husi Pesoal mediku sira husi ministeriu saude, tersa 9/11/2021.Imajen Tatoli/Antonio Goncalves

DILI, 25 novembru 2021 (TATOLI)— Tuir dadus hosi Ministeriu Saúde, hahú hosi 27 outubru to’o 24 novembru, hatudu sidadaun ho idade 12  no menus hosi 18 ne’ebé simu ona vasina Pfizer atinje ona 18,4%.

“Progresu vasina Pfizer hahú iha loron 27 outubro to’o horIseik, ba doze daruak atinje ona 18.4% ne’ebé ekivalente ho ema ne’ebé simu vasina 33.386. Enkuantu vasina doze daruak $3,6% ho ema ne’ebé simu hamutuk 6,516. Nune’e totál populasaun ne’ebé simu vasina Pfizer hamutuk 39.902,” Diretora Servisu Saúde Munisípiu Dili, Agostinha Segurado, informa ba jornalista sira iha Portu Dili, kinta ne’e.

Iha semana ne’e,  la konsege halo atividade vasina ba estudante hotu iha Dili tanba sira halo hela ezame pasajen klase.

Diretora Saude Municipio Dili, Agostinha Segurado. Imajen Tatoli/ Egas Cristóvão.

“Daudaun ita loke de’it mak iha fasilidade saúde sira nomós ospitál, maibé sira-nia vizita ne’e minimu tebes tanba estudante sei ezame hela,’’ nia informa.

Nune’e, Saúde Munisípiu Dili kontinua esforsu atu, iha semana oin hahú filafali vasina Pfizer tanba eskola balun husu komesa sábadu (27/11).  Enkuantu Alunu sira iha Atauro seidauk simu tanba laiha trasporte atu lori vasina.

“Ita nia estudante iha Atauro kuaze 1.203 mak   presiza vasina Pfizer ne’ebé iha semana oin  ita planu atubele transporta hodi estudante sira bele simu,” nia akresenta.

Nune’e, nia apela ba estudante sira atu hakbesik an ba postu vasina sira tanba ladun iha reasaun agresivu ho grau grave.

“Ita nia estudante kuaze 25.000 mak iha reasaun moderadu, maibé pesoál saúde sira iha  postu saúde   hala’o tratamentu no konsege rekupera hodi filafali ba uma,” nia afirma.

Dadus Progresu Vasinasaun. imajen/ espesial

Timor-Leste rejista totál kazu konfirmadu pozitivu COVID-19  ba labarik sira tinan 18 mai kraik na’in-3.661 (19%) no óbitu na’in-13 (11%)

Entretanty, totál vasuna AstraZeneca no Sinovac no Pfizer ne’ebé fó on aba sidadaun ho idade 12 ba leten iha territóriu nasionál hamutuk 1,068,839.

Hosi totál doze 1.068.839 ne’e,  kompostu hosi AstraZeneca doze 937,365, Sinovac doze 91,572 no Pfizer doze 39,902.

Populasaun elijível tinan 18 ba leten, ne’ebé simu ona vasina to’o iha loron 25 novembru, tuir sistema informasaun Saúde iha Ministériu Saúde, hanesan kumulativu 1ª doze iha Dili 86% no kumulativu 2ª doze iha Dili 76,2%

Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 80,2% no simu ona doze daruak 57,1%.

Notisia Relevante: Ohin, Timor-Leste laiha kazu pozitivu COVID-19

Jornalista : Felicidade Ximenes

Editor       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here