Diretór Jerál Sekretariadu Tékniku Administrasaun Eleitoral (STAE), Acilino Manuel Branco. Imajen TATOLI/Egas Cristóvão.

DILI, 25 novembru 2021 (TATOLI)—Sekretáriadu Tékniku Administrasaun Eleitorál (STAE) hala’o hela prosesu aprovizionamentu ba akizisaun ekipamentu esensiál hanesan tinta, urna no sira seluk hodi utiliza ba eleisaun prezidensiál iha 2022.

Notísia Relevante: Akizisaun ekipamentu eleitorál sei uza ba eleisaun-resensiamentu eleitorál

“Materiál importante atu utiliza ba eleisaun iha 2022 nian hanesan urna hodi halo votasaun, tinta no materiál eskritóriu balun daudaun ne’e sei iha hela prosesu aprovizionamentu. Maibé iha ekipamentu seluk hanesan karinbu, calinha de votos, materiál kesi urna, materiál eskritóriu daudaun ne’e iha ona STAE, tanba ne’e prosesu aprovizionamentu daudaun kontinua la’o hela,” Diretór Jerál STAE, Acilino Branco, hateten ba Agência TATOLI iha kna’ar fatin, Caicoli, kinta ne’e.

Kona-ba tinta atu utliza ba eleisaun nian daudaun iha hela prosesu aprovizionamentu ne’ebé prosesa liuhosi UNDP no tuir planu sei to’o Dili iha fulan dezembru ne’e. Bainhira to’o ona mak STAE sei halo fila-fali teste hafoin relata ba empreza hodi halo produsaun.

Ba buletin votu sei halo produsaun bainhira prosesu kandidatura sira atu kompete iha eleisaun prezidensiál iha tempu oin mai admitivu ona hosi Tribunál Rekursu no STAE nia apoiu tuir lei.

Tuir prosedimentu aproviziomentu ba materiál propoin espesifikasaun tenke ho estandár internasionál hodi garante ekipamentu nesesáriu ho kualidade tanba prosesu eleisaun la’o tuir lei.

“Tanba ne’e ita garante ekipamentu hotu atu utiliza ba eleisaun ho kualidade,” nia hateten.

Tuir planu ekipamentu nesesáriu atu utiliza ba eleisaun prezidensiál nian tarde liu iha fevereiru 2022 tenke kompleta to’o hotu ona iha STAE.

Antes ne’e, STAE mós halo akizasaun materiál lojístika balun hanesan laptop, printer fargo, kartaun eleitorál branco no material eskritóriu hodi fasilita servisu atendimentu resensiamentu eleitorál, ne’ebé distribui hotu ona ba munisípiu sira no iha ekipamentu balun mak sei prosesu nia laran seida’uk to’o hosi empreza ba STAE.

Tinan ne’e, STAE hetan alokasaun orsamentu millaun $4-resin hodi halo preparasaun ba eleisaun hodi atende nesesidade operasionál hanesan manutensaun viátura, kombustivél, formasaun, rekrutamentu pesoál brígada sira no lojístika hodi halo akizisaun ekipamentu.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here