Ekipa femenina Maranatha FC kontra Ass Baucau iha jogu tasa Rosa “Muki” Bonaparte. Imajen/ Hortencio Sanchez

DILI, 24 novembru 2021 (TATOLI)– Ekipa femenina Maranatha FC susesu iha nia jornada hodi tebe sai nia adversáriu Ass Baucau ho skore 2-0, iha jogu tasa Rosa “Muki” Bonaparte ne’ebé organiza hosi Federasaun Futeból Timor-Leste (FFTL), kuarta loraik ne’e, iha kampu FFTL Dili.

Vitória ne’ebé Maranatha hetan lori kedan ekipa ne’e avansa ba kuatru finál hodi hasoru AD SLB iha loron 8 dezembru ne’e.

Bainhira jogu hahú ekipa rua lansa kontra no atake ba malu hodi fó vitoria ba ekipa ida-idak tanba aplika sistema ekipa ne’ebé lakon tenke sai.

Tanba ne’e,  Maranatha hala’o jogu ho ritmu ne’ebé as atu hatama golu lais, maibé la konsege tanba Baucau hatudu jogu ho modelu defensivu la ansi hatama golu bainhira seidauk iha oportunidade.

Kontra atake mak kontinua la’o nafatin, maibé laiha ekipa ida mak prodús golu to’o termina minutu primeira parte ho rezultadu 0-0.

Hakur ba segunda parte ekipa rua mantein sira nia abilidade no tékniku ne’ebé iha hodi hadau malu bola iha kampu laran, ho mehi bele prodús golu ruma.

Maski, kosar hahú habokon jogadór sira ho minutu naruk, maibé skore kontinua mantein 0-0 tanba laiha ekipa ida mak hatama golu.

Nune’e, Jogadór Maranatha hodi hatudu nafatin jogu bonita iha kampu laran ho sorte di’ak iha minutu 82, jogadora Maranatha Maria João Carvalho (9), konsege kontrola bola ho di’ak no fura kedan rede Baucau hodi hatur rezultadu ba 1-0.

Golu ne’e hamate kedan esperansa Baucau nian, nune’e iha minutu 85, jogadora Agia Bria (27) halo tan golu ikus hatur metin rezultadu ba 2-0 to’o jogu termina laiha tan golu ruma mak akontese ba ekipa rua. Nune’e Maranatha mak iha direitu absoluta utrapasa ba kuartu finál.

Tasa Rosa “Muki” Bonaparte ne’e partisipa hosi klube ualu ne’ebé ho valór di’ak iha Liga Feto Timor hosi segunda divizaun, hanesan Maudoko FC, VDL FC no primeira Divizaun nian mak hanesan Buibere FC, S’Amuser FC, Academica FC no AD SLB.

Hosi klube ualu ne’e klube haat hanesan Maudoko FC, Academica FC, Ass Baucau no VDL obrigadu tenke elemina ona tanba la konsege manán iha jogu sira liu ona. Enkuantu klube haat seluk Buibere, Maranatha, S’Amuser no SLB mak sei kompete malu iha kuartu finál.

Notísia relevante: Tasa Rosa “Muki”, Maranatha “derrota” hasoru Buibere 1-2

Jornalista  : Hortencio Sanchez

Editór         : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here