Labarik mane ida halo atividade piñeira rai-henek iha mota Comoro, kinta (21/06/2021). Imajen TATOLI/António Gonçalves.

DILI, 24 novembru 2021 (TATOLI)—Komisaun F Parlamentu Nasionál, kuarta ne’e kontinua halo diskusaun no votasaun espesialidade ba projetu-lei númeru  29/V (3a) kona-ba lei protesaun ba labarik no foinsa’e iha perigu to’o ona iha artigu 85.

Notísia Relevante: PN aprova projetu-lei protesaun ba labarik iha jeneralidade

Prezidente Komisaun F Parlamentu Nasionál, Noé da Silva Ximenes “Buka Tuir”. Imajen Tatoli/Francisco Sony.

“Iha horiseik komesa debate diskusaun to’o ona iha artigu 85 ne’ebé iha kapítulu ikus liu no sei iha hela artigu 18. Espera katak, ohin no aban, bele ensera ona diskusaun ba espesialidade ba lei protesaun ba labarik no foinsa’e iha perigu ne’e,” Prezidente Komisaun F, Noé da Silva Ximenes ‘Buka-Tuir’, hateten ba Agência Tatoli liuhosi telefónika.

Diskusaun kontinuasaun ne’ebé komisaun hala’o iha sentru INPA-PA Maubara, munisípiu Liquiça hahú iha loron 22 to’o 23 novembru 2021, konsege diskute artigu 20 hosi kapítulu IX  ko’alia kona-ba prosesu judisiál promosaun no protesaun.

Deputadu proponente hosi komisaun halo proposta alterasaun balun hosi artigu 83 to’o mai 93 sei elimina artigu sira balun, tanba ho razaun artigu sira-ne’e hanesan ho lei kódiku sivíl, kódiku prosesu sivíl, kódiku penál no konstituisaun tanba halo lei labele iha repetisaun ba lei sira-ne’ebé agora vijente hela.

Nia fó ezemplu, iha lei foun ne’e artigu balun prevee kona-ba petisaun inisiál, prosesu konsiliasaun ne’ebé iha kódiku sivíl no kódiku penál mós prevee ona, nune’e la presiza aumenta tan.

“Tanba ne’e tenke halo eliminasaun, se lae iha intepretasaun difikulta implementadór sira. Maibé foin altera hodi hasai tiha uluk artigu tolu hanesan 83, 84 no 85 no sira seluk sei iha prosesu diskusaun nia laran,” nia dehan.

Enkuantu, iha   kapítulu IX hamutuk iha artigu 28 maibé ho tán proposta balun hosi deputadu  ne’ebé iha atu aumenta tan  kuaze artigu 30-resin.

Prezidente Komisaun E ne’e hateten, ho razaun aumenta tan artigu ne’ebé prevee presiza define artigu durasaun másima hatama petisaun inisiál ba iha tribunál hosi labarik ida hetan problema, nune’e labele difikulta prosesu ho mós iha artigu balun presiza aumenta uma mahon no instituisaun implementadór sira.

Iha projeitu ne’e, iha artigu hamutuk 103 no posivilidade bele aumenta to’o 108.

Bainhira termina diskusaun no aprovasaun komisaun sei halo relatóriu paresér debate espesialidade nian ba iha meza Parlamentu Nasionál mak sei deside ajenda ba plenária hodi halo aprovasaun iha finál globál.

Enkuantu, iha diskusaun ne’e kontinua hetan akompañamentu hosi  entidade relevante ne’ebé sai ajente implementadór ba lei refere hanesan Ministériu Solidariedade Sosiál no Inkluzaun (MSSI), Ministéiru Públiku, Defensória Públiku ho Komisaun Direitu ba Labarik.

Tuir ajenda komisaun E nian, sei kontinua halo diskusaun no aprovasaun espesiliadade ba projetu-lei ne’e iha loron kuarta (24 novembru) ne’e no sei termia iha 25 novembru 2021.

Preámbulu hosi projetu-lei ne’e previstu kona-ba dezenvolvimentu ida ba sistema protesaun integrál ba labarik sira, nune’e impoin esforsu armonizasaun lei hotu-hotu relasaun ho promosaun no protesaun diretu ba labarik no joven iha perigu sira.

Projetu-lei ne’e iha artigu hamutuk 103 no kapítulu hamutuk IX. Kapítulu I ko’alia kona-ba dispozisaun jerál, kapítulu II ko’alia kona-ba intervensaun ba promosaun direitu sira no protesaun labarik no joven iha perigu.

Vítima dezastre naturál iha Manleuana, tersa (07/09). Imajen TATOLI/Francisco Sony

Kapítulu III ko’alia kona-ba medida promosaun direitu no protesaun, kapítulu IV ko’alia kona-ba komunikasaun, kapítulu V ko’alia kona-ba intervensaun Ministériu Públiku, kapítulu VI previstu dispozisaun prosesuál jerál, kapítulu VII sita kona-ba prosedimentu urjénsia, kapítulu VIII ko’alia kona-bá prosesu iha serbisu protesaun labarik no foinsa’e no kapítulu IX ko’alia kona-ba prosesu judisiál promosaun no protesaun.

Deputadu sira-ne’ebé sai proponente ba projetu-lei ne’e mak hanesan Noé da Silva Ximenes “Buka Tuir”, António Verdiál de Sousa, Felix da Costa “Anin Buras”, Cidália Mesquita Ximenes, Maria Gorumali Barreto, Helena Martins Belo, António Nobre Tilman, Lúcia Taeki, Veneranda Lemos Martins no Ernesto Fernandes “Dudu”.

Inisiativa lejizlativa ne’e bazea ba rezolusaun Parlamentu Nasionál númeru númeru 16/2003, 30 jullu, ne’ebé Timor-Leste ratifika Konvensaun kona-ba Direitu Labarik.

Entidade sira-ne’ebé submete paresér ba projetu-lei ne’e mak hanesan ALFeLa, Asosiasaun Defisiente Timor-Leste (ADTL), Child Fund, Komisaun Nasionál Direitu Labarik, FOKUPERS, FONGTIL, JSMP, Ministériu Justisa, Ministériu Saúde, Ministériu Solidariedade Sosiál no Inkluzaun, Ministériu Públiku, nune’e mós Organizasaun Internasionál ba Traballu (OIT), Parlamentu Foinsa’e, Plan International, PDHJ no UNICEF.

Notísia Relevante: Komisaun F sei inklui paresér entidade relevante iha projetu-lei protesaun labarik

Jornalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here