Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, kuarta (24/11). Imajen TATOLI/Francisco Sony

DILI, 24 novembru 2021 (TATOLI)—Governu liuhosi reuniaun Konsellu Ministru (KM) iha kuarta ne’e, aprova Projetu Dekretu-Lei ne’ebé aprezenta hosi Ministru Finansa, Rui Augusto Gomes, ba pagamentu estraordináriu saláriu adisionál fulan-ida (13o) ba funsionáriu, ajente no kontratadu administrasaun públika iha fulan-dezembru.

“Ho aprovasaun ne’e, ajente administrasaun públika sira abranje iha pagamentu estraordináriu ida-ne’e, exetu funsionáriu kontratadu estranjeiru,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Antes ne’e, pagamentu extra ne’e ba tinan 2021 destina ba funsionáriu, ajente no kontratadu administrasaun públika, exetu funsionáriu kontratadu ho saláriu $5.000 ba leten no funsionáriu kontratadu estranjeiru sira.

Notísia relevante: MF esforsu konklui pagamentu saláriu désimu terseiru

Aprova mós kona-ba pagamentu suplementár ba funsionáriu no ajente sira ne’ebé maka halo servisu ba prosesu preparasaun Orsamentu Jerál Estadu (OJE) 2022 no taka Konta Jerál Estadu tinan 2021.

“Nune’e, suplementu ida-ne’e ho objetivu atu kompensa volume estraordináriu serbisu funsionáriu no ajente sira hosi Ministériu Finansa ba prosesu ne’ebé ezije no rekoñese katak iha jornada serbisu ne’ebé boot liu kompara ho períodu normál ne’ebé prevee iha lei,” Portavóz Governu dehan.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here