Ministru Finansa, Rui Augostu Gomes. Imajen TATOLI/António Gonçalves

DILI, 05 janeiru 2021 (TATOLI)—Maski tama ona tinan fiskál foun maibé pagamentu ba désimu terseiru seidauk konklui, tanba ne’e daudaun Ministériu Finansa (MF) sei esforsu halo pagamentu, liuliu ba funsionáriu públiku.

Ba kestaun ne’e, Ministru Finansa, Rui Augostu Gomes, hateten pagamentu ba funsionáriu públiku tarde tanba iha instituisaun balun maka orsamentu 2020 iha défise.

“Instituisaun ka liña ministeriál ne’ebé orsamentu negativu, Ministériu Finansa halo hela ezersísiu ba segunda kalkulasaun, tanba kalkulasaun ida-ne’e maka depois bele foti husi fundu rezerva kontijénsia,” Ministru Rui relata hafoin ramata reuniaun ho Primeiru-Ministru, Taur Matan Ruak, iha Palásiu Governu, tersa ne’e.

Notísia Relevante: Governu aprova saláriu désimu terseiru ba administrasaun públika

Enkuantu, pagamentu désimu terseiru ba instituisaun seluk ne’ebé laiha défise, kuaze konklui ona.

Maski nune’e, governante ne’e husu ba funsionáriu ne’ebé seidauk simu pagamentu adisionál ne’e, atu lalika preokupa tanba pagamentu prosesa hela.

“Prosesu la’o hela, bele atraza tan semana ida ou rua atubele finaliza,” nia akresenta.

Bainhira Agência TATOLI husu kona-ba funsionáriu públiku no kontratadu hira mak iha direitu ba saláriu désimu terseiru inklui totál pagamentu, membru ezekutivu ne’e la fiksa númeru.

Antes ne’e, iha loron 20 novembru 2020, liuhosi reuniaun Konsellu Ministru, Governu aprova pagamentu estraordináriu saláriu adisionál fulan-ida  ba administrasaun públika iha dezembru.

Pagamentu estra ne’e destina ba funsionáriu, ajente no kontratadu administrasaun públika, exetu funsionáriu kontratadu ho saláriu $5.000 ba leten no funsionáriu kontratadu estranjeiru sira.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here