Governu liuhosi Ministru Finansa, Rui Augusto Gomes, troka nota entendimentu ho Diretór Ezekutivu Kooperasaun Internasionál Koreia (KOICA, sigla Inglés) iha Timor-Leste, Eunju Cha, kona-ba dezevolvimentu Dijitalizasaun Sentru Nasionál Chega (CNC). Iha salaun CNC, segunda (22/11). Imajen Tatoli/Francisco Sony.

DILI, 22 novembru 2021 (TATOLI)—Governu Timor-Leste no Ajénsia Kooperasaun Internasionál Korea (KOICA) asina akordu subvensaun millaun $5 atu hametin liután Timor-Leste ninia responsabilidade nasionál no kapasidade atu harii futuru ne’ebé di’ak iha dame, justisa no prosperidade liuhusi aprende hosi pasadu durante tinan 24 kona-ba violasaun direitu umanu no justisa iha konflitu polítika (1974-1999).

Notísia Relevante: KOICA apoia millaun $5 hodi harii sistema jestaun sustentável CNC, I.P

Asinatura akordu subvensaun ne’e, Timor-Leste reprezenta hosi Ministru Finansa (MF), Rui Augusto Gomes no Diretóra KOICA, Eunju Cha, atu dijitaliza dokumentu istóriku kona-ba violasaun direitu umanu.

Ministru Finansa, Rui Augusto Gomes. Imajen Tatoli/Francisco Sony

“Liuhosi akordu asinatura ida-ne’e, KOICA sei fornese orsamentu millaun $5 hodi transforma CNC sai sentru nasionál ba kualidade, istória no edukasaun, harii dame nu’udar dalan ida atu haforsa kapasidade nasionál no rejionál ba rekonsiliasaun konflitu, harii dame no harii Estadu. Projetu ne’e ho objetivu atu haforsa responsabilidade nasionál no kapasidade iha dame, justisa, no prosperiedade liuhusi aprende hosi pasadu durante tinan 25 (1974-1999), violasaun direitu umanu no justisa, iha konflitu polítika,” Ministru Finansa, Rui Gomes, hateten iha ámbitu asinatura akordu subvensaun ne’e iha salaun enkontru CNC, Antigu Komarka, Balide, Dili, segunda ne’e.

Loos duni katak dijitalizasaun nu’udar xave ida. Daudaun ne’e Governu inisia ona instalasaun kabu submariñu liga Darwin mai Díli, dijitalizasaun chega sei iha potensialidade atu realiza mandatu morál ba ita-nia nasaun no demostra kompromisu boot ba dame no rekonsiliasaun, respeitu ba direitu umanu no dignidade umanu, la’ós de’it iha rai-laran maibé mós iha rejiaun no iha nível global.

Bainhira hahú projetu dijitaizasaun ida-ne’e, Timor-Leste sei hetan nafatin apoiu, esperiénsia no peritu hosi UNESCO ho CNC nu’udar implementadór servisu hamutuk ho Ministériu Edukasaun, Juventude no Desportu (MEJD). Reabilitasaun biblioteka halo parte mós iha projetu ida ne’e.

Governu liuhosi Ministru Finansa, Rui Augusto Gomes, nota entendimentu ho Diretór Ezekutivu Kooperasaun Internasionál Koreia (KOICA, sigla Inglés) iha Timor-Leste, Eunju Cha, kona-ba dezevolvimentu Dijitalizasaun Sentru Nasionál Chega (CNC). Iha salaun CNC, segunda (22/11). Imajen Tatoli/Francisco Sony

“Ho dijitalizasaun espera katak CNC sei inisia biblioteka eletrónika, dezenvolve jestaun informasaun no sistema arkivu ida-ne’ebé di’ak liután. CNC nia biblioteka eletrónika ida-ne’e tenke sai hanesan odamatan boot ida, tantu ba ema ne’ebé mai hosi rai-li’ur nomós ema sira iha rai-laran atubele asesu ba informasaun importante kona-ba istória no legadu nasaun ninian,” nia dehan.

Governante ne’e agradese ba apoiu no jenorizidade KOICA, Timor-Leste prontu atu hametin serbisu parseria ho KOICA ba futuru dezenvolvimentu Timor-Leste nian.

“CNC iha mandatu ida-ne’ebé boot liután hodi kobre edukasaun, dezenvolvimentu no prezervasaun arkivu no diseminasaun informasaun. Importante tebes katak servisu hirak ne’ebé dezenvolvidu ona ita bele prezerva, serbisu parseria no ligasaun ho parseiru ne’ebé iha esperiénsia hanesan Korea bele hametin liután servisu CNC nian,” nia hateten.

Ministru Finansa konsidera, serimónia asinatura ida-ne’e marka pontu importante ida iha progresu servisu ne’ebé Centro Nacional Chega, Institutu Públiku (CNC,I.P) nu’udar instituisaun importante estabelesidu iha outubru 2016 liuhosi dekretu-lei 48/2016.

Nune’e, iha jullu 2017 CNC hahú la’o hafoin nomeasaun konsellu administrativu no orgaun ezekutivu atu haklaken koneuudu relatóriu final CAVR “Chega!” no rekomendasaun sira husi Komisaun Verdade no Amizade (CVA, siglá protugés) “Memoriam Ad Spem”.

Daudaun ne’e, CNC dokumenta ema liu rihun 200 mak mate durante liu dékade rua ne’ebé CAVR rekolla hosi violasaun direitu umanu ne’ebé akontese iha funu naruk hahú hosi 1974 to’o 1999.

Nia hatutan, misaun di’ak sira-ne’ebé Timór-oan sira iha prosesu sei kontinua fahe ho parseiru sira iha área rejionál, partikularmente iha ASEAN, atu hametin Timor-Leste nia legadu nu’udar nasaun ida-ne’ebé dedikadu ba demokrasia, dame no dereitu umanu.

Embaixadór Koreia ba Timor-Leste, Jeong Ho Kim, afirma Timor-Leste no Korea iha esperiénsia istóriku.

“Korea no Timor-Leste, ita iha esperiénsia istóriku ne’ebé hanesan hosi tempu okupasaun ba independénsia iha ita-nia tempu modernu. Atu rekopera estragus no kanek sira kauza hosi tempu konflitu. Ita presiza atu hanoin no aprende hosi istória violasaun direitu umanu no justisa. Ohin loron, ita ofisialmente hakat ba oin hodi leno istória nakukun Timor-Leste nian. Liuhosi apoiu ne’e, sei enkoraja timor-oan sira atu kuda memória istória ne’ebé propriu no konsiénsia,” Embaixadór Koreia ba Timor-Leste, Jeong Ho Kim, haktuir.

Notísia Relevante : CNC halo kooperasaun KOICA ho UNESCO

Jornalista : Antónia Gusmão

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here