Diretór Ezekutivu Centro Nacional Chega, Hugo Maria Fernandes. Imajen Tatoli/Egas Cristóvão

DILI, 15 setembru 2021 (TATOLI)-Diretór Ezekutivu Centro Nacional Chega, Institutu Públiku (CNC I.P), Hugo Maria Fernandes, kuarta ne’e, realiza enkontru ho KOICA hodi ko’alia kona-ba kooperasaun entre CNC, KOICA no Organizasaun Nasaun Unida ba Edukasaun Siénsia no Kultura (UNESCO sigla- inglés), ne’ebé sei servisu hamutuk hodi implementa programa boot tolu.

“Ita-nia kooperasaun parte tolu ne’e halo diskusaun la’o ba mai dezde tinan kotuk ona, hodi ko’alia kona-ba implementasaun apoiu finanseiru ba programa boot tolu hanesan, atu dezenvolve arkivu sira, programa sira iha relasaun ho introdusaun konteúdu Chega nian, no estabelesimentu sentru rezolusaun konflitu iha Timor-Leste,” Hugo Maria Fernandes ba Agência Tatoli iha nia knaar fatin Antigu Komarka, Balide, Dili.

Nia afirma, programa kona-ba dezenvolve arkivu mak hanesan hahú hosi reabilitasaun ba sentru arkivu no dijitalizasaun arkivu sira, nune’e implementasaun ba programa sira iha relasaun ho introdusaun konteúdu Chega nian mak introdús iha kurríkulu partikularmente ba kurríkulu primária no sekundária nian iha formal rua kurríkulu formal, no produsaun matéria edukativu sira.

“Estabelesimentu sentru rezolusaun ba konflitu iha Timor-Leste mak sei harii iha Dili, no sai mós sentru ida iha rejiaun ida ne’e hodi sai fatin ne’ebé ita fó ba ema atu aprende istória pasadu nian no haree mekanizmu rezolusaun konflitu polítiku pasadu nian, ne’ebé nia intensaun mak atu sai sentru exelente ida iha atividade relasaun estabelese parseria ho sentru sira iha rejiaun, no iha programa interkámbiu, estudu konferénsia, iha Timor no país sira seluk ne’ebé mak sei halo,” nia dehan.

Parseria ida ne’e  sei halo durante tinan haat hahú 2021-2025 no atu implementa programa sira ne’e kinta aban (16/09) sei iha uluk asina nota entendimentu entre KOICA no UNESCO hafoin ida ne’e mak sei iha asinatura konkordánsia entre KOICA ho CNC no mós asinatura konkordánsia entre KOICA no UNESCO.

“Ida ne’e parseria multilateral ida entre Ajénsia internasionál rua, atu implementa programa tolu ne’e osan ne’e mai hosi KOICA hamutuk millaun $5 maibé iha implementasaun téknika ne’e mak CNC ho UNESCO, entaun aban sei asina nota entendimentu entre KOICA no UNESCO ne’e iha nivel internasionál nian, bainhira nota entendimentu hotu mak ita hala’o programa sira,” nia dehan.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here