Arsebispu Arkidioseze Metropolitana Dili, Dom Virgílio do Carmo da Silva. Imajen Tatoli/Francisco Sony.

DILI, 21 novembru 2021(TATOLI)–PrimeiruMinistru, Taur Matan Ruak, no Arserbispu Arkidioseze Metropolitana Dili, Dom Virgílio do Carmo da Silva, SDB, domingu ne’e inaugura igreja Sagrado Coração de Jesus Becora.

Notísia Relevante: GASC transfere millaun $1.8-resin ba konstrusaun igreja Becora

Inaugurasaun ne’ebé hahú ho misa solenidade iha selebrasaun ba Kristu Liurai nia loron, hahú iha tuku 07h30 dadeersam ne’ebé prezide hosi Arsebispu Arkidioseze Metropolitana Dili, Dom Virgílio do Carmo da Silva.

Arsebispu Arkidioseze Metropolitana Dili, Dom Virgílio do Carmo da Silva, asina plaka hodi inaugura Igreja Sagrado Coração de Jesus Becora, domingu (21/11). Imajen Tatoli/Francisco Sony.

Dom Virgílio hateten, uma kreda liu-liu Dioseze Dili nia naran hato’o agradesimentu ba VIII Governu Konstitusionál no entidade hotu-hotu nia apoiu, no kontribuisaun ba obra igreja Becora ne’ebé loron ohin bele hamriik no inaugura.

“Ha’u tuur iha ne’e, ha’u haree igreja furak tebes. Se furak liu tan bainhira sarani hotu iha Becora, se ita hotu esforsu halo furak ita-nia an hanesan igreja,” Dom Virgílio hateten hafoin misa ramata.

Arsebispu husu ba sarani Becora katak, ho igreja foun ne’e sarani sira esforsu atu labele baruk hakbesik an ba igreja liuhosi hametin fidelidade iha Nai Maromak.

Primeiru-Ministru, Taur Matan Ruak, hateten Governu apresia tebes ba igreja Becora tanba halo ho kualidade.

“Ha’u kontente loos, haree konstrusaun igreja ida-ne’e tanba ninia konstrusaun kualidade  tebes. Tanba ne’e mak ha’u lori VIII Governu nia naran agradese ba amo bispu no amu Paróku, Koodenadór Gabinete Sosiadade Sivil, kompañia ne’ebé fó apoiu hodi finaliza konstrusaun ida-ne’e,” Xefe Governu, Taur Matan Ruak hateten iha ninia intervensaun iha serimónia inaugurasaun igreja Sacrojes Becora.

Xefe Governu ne’e hateten, Governu la haluha partisipasaun igreja ba luta libertasaun nasionál Timor-Leste nian, tanba ne’e tuir konkordata ne’ebé Estadu ho parte igreja asina, Governu kontinua apoiu parte igreja tuir kbiit finansiamentu ne’ebé mak iha.

Taur Matan Ruak husu ba komunidade hamutuk ho parte igreja tau matan ba iha igreja foun ida-ne’e, karik udan been kona tinta balun moos, haree hodi hadi’a fila-falI nune’e kuidadu igreja ne’e nia obra nafatin di’ak.

Primeiru-Ministru, Taur Matan Ruak, asina plaka hodi inaugura Igreja Sagrado Coração de Jesus Becora iha domingu (21/11). Imajen Tatoli/Francisco Sony.

Paróku Becora, Pe. Domingos Maubere, hateten nia parte agradese ba Arsebispu Arkidioseze Metropolitana Dili, Dom Visrgílio do Carmo da Silva no ba Governu ne’ebé hatudu prontidaun apoia másima ba obra igreja Becora to’o ohin iha ona nia finalidade ba inaugurasaun.

“Ha’u kontente tebe-tebes. Maske ita-nia komunikasaun, ita ne’e susar tebe-tebes maibé ho apoiu Governu ninian ba igreja foun Becora ne’e rasik ohin ita inaugura ona. Ba oin, parte igreja sei la hakotu komuikasaun ho Governu no sei husu nafain apoiu. Husu ba sarani Becora atu  badinas tuir misa, nune’e hametin fiar ba Nai Maromak,” nia dehan.   

Prezidente Komisaun Organizadora, Padre Guilhermino da Silva hateten, prosesu konstrusaun ba igreja Becora dezde inisiu 2013 iha mandatu Governu dalimak nian.

Obra dauluk ba konstrusaun ne’e ho kotratór kompañia Integra Lda mak halo konstrusaun ho valór $1,398,956, maibé parte Ajénsia Dezenvolvimentu Nasionál halo verifikasaun ba planta no kadernu enkargu (BoQ) ne’e aprova $938.1303.97, maibé tanba dezeñu la kompletu parte komisaun retira.

Ho nune’e, parte komisaun konstrusaun foun greja Becora buka fali kontratór seluk mak kompañia BTK no aprezenta fali proposta foun ho kustu konstrusaun ba igreja $2.111.381.05. ho parte ADN aprova proposta ida-ne’ebé aprova hosi Primeiru-Ministru, Xanana Gusmão.

Hosi montante ida-ne’e Deoseze Dili mós finansia sorin ho montante $300 mil no Governu apoia tan millaun $1 ne’ebé to’o ohin finaliza nian konstrusaun.

Jornalista : Natalino Costa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here