Saudozu Alvaro do Nascimento “Sesurai”. Imajen/Espesiál.

COVALIMA, 18 novembru 2021 (TATOLI)—Segundu Vise Sekretáriu Sub-Rejiaun, Felix Amaral “Sakari” informa, Saudozu Álvaro do Nascimento “Sesurai’ ema-ne’ebè brani iha prosesu luta ba ukun rasik an hodi liberta povu no rai Timor-Leste hosi okupasaun ilegál Indonézia.

Notísia Relevante: Komunidade Covalima simu saudozu ‘Sesurai’ nia mate-isin ho lia-dadolin

Vise Sekretáriu sub-rejiaun, Feliz Amaral ‘Sakari’. Imajen Tatoli/Celestina Teles.

“Ami-nia atividade frente klandestina, ami kuñese malu iha 1989 saudozu ema-ne’ebè mak korajen no brani tebes. Maske inimigu kaptura Saudozu, maibé ho saudozu nia brani hasoru saida de’it no saida mak di’ak ba Covalima nia halo de’it,” Felix Amaral ‘Sakari’ konta istória, bainhira lori Saudozu Sesurai nia mate-isin to’o iha nia rezidénsia aldeia Tabakolot, suku Debos, kinta ne’e. 

Tanba ne’e, veteranu sira sente lakon sira-nia kolega luta ba rai ida-ne’e, ne’ebè mak hakotu ona nia pregrinasaun moris.

“Ami sente lakon saudozu. Maske nia hakotu ona nia peregrinasaun moris, ita-nia domin boot liu maibé planu Maromak Ni’an, ami sei kontinua memória ne’ebè mak nia husik hela mai ami sei kontinua nafatin,” nia informa. 

Vise Konsellu Veteranu Kombatente Nasionál, Francisco Sarmento ‘Lamesak’ dehan maske iha tempu defisil hosi simu karta hosi líder Nasionàl Kay Rala Xanana Gusmão. 

Iha tempu defisil tebes ami simu karta hosi Maun Xanana Gusmão nia imajen no kasete, ami konsege hamutuk suku Suai Loru, aldeia Akar Laran, iha momentu ema na’in-40 atu lori ita-nia luta ba oin. ami na’in-rua foin hasoru malu organiza ema sira iha postu administrativu Suai Vila to’o iha postu sira seluk,” Lamesak dehan. 

SaudozuÁlvaro do Nascimento ‘Sesurai’ bainhira ema-ne’ebè mak la brani sei la hasoru nia, tanba nia ema-ne’ebè si’ak-teen nia dignifika nia an ba luta ida-ne’e, liuhosi rejisténsia klandestina ne’ebè nia lidera.  

“Ami hala’o servisu hamutuk organiza ita ema to’o iha 1989 ami forma estrutura. Ha’u hanesan Primeiru Vise sub-rejiaun ami lakon ami-nia maun ne’ebè mak nia husik hela mundu ida-ne’e,” nia hateten. 

Lamesak dehan, Saudozo hakotu nia pregrinasaun moris maibé nunka husik hela nia lia-menon ba estrutura iha postu administrativu hotu (7), Nurep harii iha tempu ne’ebè defisil. 

Saudozu hakotu nia peregrinasaun moris iha Hospital Nasionàl Guiduo Valadares (HNGV), iha loron 16 novembru ne’e, tanba sofre moras komplikadu. 

Saudozu Álvaro do Nascimento ‘Sesurai’, moris iha suku Lour, aldeia Pelet, postu administrativu Zumalai, loron 05 fulan-juñu tinan 1965. Nia aman naran Mau Laca no inan Bui Leto ho nia maun-alin hamutuk na’in-haat (4) kompostu hosi mane na’in-rua (2) no feto na’in-rua (2).

Saudozo Alvaro Do Nascimento ‘Sesurai’ nu’udar oan ba dahaat ka oan ikun hosi maun-alin na’in-haat (4).

Iha 1971, Saudozu hahúu ninia estudu primeira klase iha Odelgomo maibé saudozu kompleta ninia estudu primeira klase komplete iha Fatuleto.

Iha 1972 no 1973, saudozu kontinua ninia estudu segundu no terseiru ano iha Eskola Militár Anapal.

 Iha 1974, saudozu kontiniua ninia estudu Kuarta klase iha Eskola Militár Anapal, maibé saudozu la kompleta ninia estudu tanba mosu ona diverjensia polítika partidaria no Golpe.

Saudozu nia partisipasaun luta ba libertasaun Nasionál, iha tinan 1975 mai to’o tinan 1979 Saudozu hahú ninia involvimentu funu iha baze de apoiu no durante periódu iha ai-laran, saudozu asume kargu nu’udar 10 vise-responsável ba Edukasaun no kultura. Iha 1981 mai to’o tinan 1983, saudozu kontniua hala’o servisu iha Frente Klandestina. 

CRRN nu’udar ativista iha Zumalai

Iha 1984 mai to’o 1986 saudozuu asume kargu nu’udar kolaborador OCR iha Dili. Iha 1987 to’o tinan 1989, saudozu asume kargu nu’udar Vise Sekretáriu OCR iha Dili. Iha 1989 mai to’o 1992, saudozu asume kargu nu’udar sekretáriu ODIR.

Iha 1992 too tinan 1999, saudozu asume kargu nu’udar sekretáriu Sub-Rejiaun 12 de Outubru to’o funu ramata no hetan liberdade.

Saudozu hakotu nia peregrinasaun iha mundu ho idade 56 no husik hela nia feen ho nia oan na’in-neen (6) kompostu hosi feto rua (2) no mane haat (4).

 Jornalsita : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here