Mate-isin Saudozo Álvaro do Nascimento ‘Sesurai’ to’o iha Covalima. Imajen Tatoli/Celestina Teles.

COVALIMA, 18 novembru 2021 (TATOLI)—Saudozu Álvaro do Nascimento ‘Sesurai’ nia mate-isin, kinta ne’e to’o ona iha munisípiu Covalima hafoin hakotu iis iha Hospital Nasionàl Guido Valadares (HNGV).

Notísia Relevante: Veteranu “Sesurai” hakotu iis tanba moras komplikadu

Saudozo nia mate-isin transporta hosi Dili mai iha munisípiu Covalima iha loron 16 fulan-novembru maibé hatuur kalan ida iha nia uma lisan Puk Gewen iha Zumalai. 

Veteranu no faluk oan ki’ak sira simu saudozu ‘Sesurai’ nia mate-isin ho matan-ween. Imajen Tatoli/Celestina Teles.

Hafoin iha loron 18 fulan-novembru ne’e transporta fali saudozu nia mate-isin hosi Zumalai liuhosi auto-estrada Labarai, Sanfuk, Camnasa (Tugu) hodi simu saudozu nia mate-isin ho lia-dadolin eroi nian nu’udar aman ba funu libertasaun Nasionàl no líder másimu frente klandestina iha Covalima ba iha nia rezidénsia aldeia Tabakolot, suku Debos, postu administrativu Suai Vila. 

Lia-na’in sira Reprezenta hosi Munisípiu Covalima, Miguel Armando Cardoso, simu saudozu ‘Sesurai’ nia mate-isin ho lia-dadolin tuir kultura munisípiu Covalima nian.

“Ita-boot mak forsa, ita-mak na’in ba Sesurai no ita mak manu aman. Independensia no liberdade, ukun rasik an iha ita bo’ot nia liman,” Miguel Armando Cardoso hato’o lia-dadolin hodi simu saudozu ‘Sesurai’ nia mate-isin hodi hatuur iha nia rezidénsia. 

Hafoin hato’o lia-dadolin, Vise-Konselu Kombatente Libertasaun Nasionàl, Francisco Sarmento ‘Lamesak’, dirije “um minuto de silêncio’ (minutdu ida hakmatek) hodi presta omenajen ba Saudozo Álvaro do Nascimento ‘Sesurai’. 

Komunidade hamutuk ho família akompaña saudozu ‘Sesurai’ nia mate-isin, hodi lori ba saudozu nia rezidénsia. Iha ne’ebá, iha matebian nia hatur fatin, membru Polísia Nasionál Timor-Leste no FALINTIL-Forsa Defeza Timor-Leste (F-FDTL) mak sei fó seguransa.

Saudozu “Sesurai’ sei hatuur iha nia rezidénsia Tabakolot durante loron rua (2) kalan ida, ne’ebè veteranu no faluk oan ki’ak sira, autoridade sívil no militár, funsionáriu Estadu, estudante no grupu no entidade sira seluk sei presta omenajen ikus ba saudozu. 

Iha loron 19 fulan-novembru, antes haloot iha fatin hakmatek rohan laek nian, saudozu ‘Sesurai’ nia mate-isin vizita sede Konsellu Veteranu Munisípiu Covalima, hafoin lori saudozu nia mate-isin ba igreja halo misa requiem no sei haloot iha nia rezidénsia sorin.

Tuir observasaun Agência Tatoli nota katak, ema sira-ne’ebé marka prezensa hodi simu saudozu ‘Sesurai’ nia mate-isin mak Deputadu Partidu demokrátiku, Adriano do Nascimento, Administradór Munisípiu Covalima, Veteranu Aquilo Guterres Ete Uku ho nia espoza, no komunidade iha Covalima.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here