Saudozu Alvaro do Nascimento “Sesurai”. Imajen/Espesiál.

COVALIMA, 16 novembru 2021 (TATOLI)—Veteranu no Prezidente Konsellu Veteranu Munisípiu Covalima, Alvaro do Nascimento “Sesurai”, tersa ne’e hakotu is iha Hospitàl Nasionàl Guido Valadares (HNGV) tanba moras komplikadu.

“Saudozu baixa iha HNGV durante fulan haat tanba saudozo sofre moras komplikadu no hakotu iis iha ohin dadeer tuku 09h00. Saudozu nia mate-isin sei transport aba Covalima, iha aban (kuarta, 17 novembru) meudia (loron manas),” Saudozu Sesurai nia oan mane, Alvaro Maia, hateten ba Agência Tatoli, liuhosi telefónika, tersa ne’e.

Daudaun ne’e, saudozu Alvaro do Nascimento “Sesurai” nia mate-isin hatuur hela iha nia ona mane nia rezidénsia Aduian (iha loja TOP ONE) nia kotuk. Saudozu Sesurai moris iha Covalima, iha loron 06 fulan-maiu tinan 1965.

Saudozu Alvaro do Nascimento “Sesurai”. Imajen/Espesiál.

Saudozu Alvaro do Nascimento “Sesurai” nia kontribuisaun luta ba libertasaun nasionál, saudozu nu’udar Vise-Sekretáriu Rejiaun IV. Iha ámbitu ukun rasik an ne’e, ho saudozu nia nasionalizmu no patritizmu, saudozu Sesurai sempre hateten; “Halo di’ak ba Covalima ne’e halo de’it. Halo aat ba Covalima mak labele”.

Tuir obsevasaun, oras ne’e daudaun Konsellu Veteranu Munisípiu Covalima hamutuk ho familia prepara no hamoos hela fatin hodi hein Saudozo Alvaro do Nascimento “Sesurai” nia mate-isin.

Administradór Munisípiu Covalima, Francisco de Andrade, hateten Saudozu Alvaro do Nascimento “Sesurai” nu’udar veteranu ida-ne’ebé lidera Konsellu Veteranu ne’ebé destina iha Munisípio Covalima.

“Saudózu ‘Sesurai’ nu’udar ita-nia veteranu. Nu’udar administradór, ha’u sei vizita hodi presta omenajen bainhira nia mate-isin to’o ona iha Covalima. Agora, ami prepara hela atu simu nia mate-isin,” Francisco Andrade hateten ba jornalista sira iha nia knaar fatin, tersa ne’e. 

Tuir Francisco, nia parte lakonsege vizita veteranu ‘Sesurai’ tanba durante ne’e saudozu Alvaro do Nascimento “Sesurai” baixa hela iha Hspital Nasionàl Guido Valadares (HMGV) Dili. 

“Maske durante nia moras ami la vizita no la iha kontaktu ho saudozu, maibè ha’u hasoru malu ho Vise Prezidente Konsellu Veteranu Munisípiu Covalima,” nia dehan.

Kona-ba asuntu ne’e, bainhira jornalista tenta atu halo entrevista ho Vise-Presidente Konsellu Veteranu Covalima, Osório Soares ‘Mausoko’, maibé nia parte seiduak bele fó informasaun tanba hafoin rona katak saudozu Alvaro do Nascimento hakotu iis, nia sente lakon hanoin nomós defisil tebes.

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here