Funsionáriu APORTIL halo greve iha Portu Dili, Colmera, kinta (18/11). Imajen TATOLI/Francisco Sony

DILI, 18 novembru 2021 (TATOLI)Funsionáriu Autoridade Portuáriu Timor-Leste (APORTIL), hamutuk na’in-19 halo greve hodi ezije ba Konsellu Administrasaun atu rezolve direitu suplmentu remuneratóriu tanba sira konsidera hanesan pesoál liña frente.

Reprezentante Funsionáriu halo greve no Xefe Operasaun no Karga, Yaser Alnaldo. Imajen TATOLI/Francisco Sony

“Durante Konfinamentu obrigatóriu, ami kontinua hala’o serbisu iha portu Dili, maibé ami rona katak lei la fó dalan atu ami iha direitu ba subsídiu liña frente, ida-ne’e tanba sa? durante ne’e ami halo serbisu, bele dehan katak sasán kiik ka boot sai hosi APORTIL no ami hanesan instituisaun públiku ne’ebé serbisu maka’as durante ne’e”, Reprezentante Funsionáriu halo greve no Xefe Operasaun no Karga, Yaser Alnaldo, hateten, iha Portu Dili, Colmera, kinta ne’e.

Notísia relevante: MF halo pagamentu suplementu remuneratóriu ba liña frente Polísia Migrasaun

Reprezentante ne’e nota katak instituisaun sira hanesan Autoridade Aduaneira/Alfándega sira ne’ebé hala’o serbisu iha pontu entrada sira bele simu suplementu remuneratóriu, maibé APORTIL ne’ebé ho knaar boot iha pontu entrada marítima mak laiha direitu.

“Bainhira ami laiha, atividade portu labele la’o no ró mós labele tama hodi sasán esensiál tama-sai hosi portu. Ami durante n’e serbisu la’o normál, paradu de’it oituan momentu inundasaun, maibé ami esforsu nafatin serbisu,” nia haktuir.

Nune’e, funsionáriu sira husu ba Konsellu Administrasaun APORTIL hodi rezolve kestaun ne’e, tanba se lae maka sira nafatin hala’o greve to’o hetan solusaun.

Konsellu Administrasaun laiha koñesimentu

Hatán ba preokupasaun ne’e, Prezidente Konsellu Administrasaun APORTIL, Flávio Cardoso Neves, hateten, asaun sira ne’ebé funsionáriu sira halo daudaun, Konsellu Administrasaun laiha koñesimentu.

Prezidente Konsellu Administrasaun APORTIL, Flávio Cardoso Neves. Imajen TATOLI/Francisco Sony

“Loron hirak liubá, ami esplika katak ema ne’ebé tama iha liña frente ne’e bazeia ba Rezolusaun Konsellu Ministru ne’e klaru, ami haree laiha naran APORTIL, tanba desizaun ne’e polítiku sira mak foti, maibé tanba iha Parlamentu Nasionál mós temi APORTIL, maka deklarasaun sira ne’e fó esperansa ba funsionáriu sira maibé Konsellu Administrasaun hateten ba sira katak kalma tanba presiza tempu atu rezolve,” Flávio Cardoso esplika.

Responsável ne’e dehan, maski funsionáriu sira halo protesta, la signifika atu taka atividade portu nian.

“Atividade kontinua la’o nafatin tanba Portu Dili mak odamatan ba sasán sira hotu, kuandu tama afeta ba atividade seluk. Ha’u orienta ona Diretór Operasionál atu orienta funsionáriu sira loke nafatin portu no fó oportunidade ba superiór hodi buka solusaun, tanba kona-ba pagamentu ne’e, Ministériu Finansa sei la simu lista APORTIL nian tanba bazeia ba razaun ruma, tanba ne’e maka fó tempu ba Konsellu Administrasaun hodi halo koordenasaun ho ministériu relevante hodi responde ba ezijénsia ne’e,” Flávio Cardoso dehan.

Antes ne’e, Prezidente Repúblika, Francisco Guterres Lú Olo, promulga ona altersaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira Orsamentu Jerál Estadu (OJE) 2021 ramata, karik presiza hatutan suplementu ne’e ba tinan 2022, presiza iha fali Dekretu-Lei foun ida.

Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19.

Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA),Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia,  Diresaun Nasionál Seguransa Patrimóniu Públiko, no servisu autoridade ka administrasaun munisipál,  responsável ba halibur, lori no  soe lixu, sira-ne’ebé hola parte servisu autoridade ka administrasaun munisipál,  servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).

Antes ne’e, Prezidente Repúblika promulga Dekretu-Lei númeru 17/2020 loron 30 abríl, hodi fó direitu ba traballadór liña frente, atu idaidak simu mós suplementu remuneratóriu ida, ho efeitu hosi marsu 2020, maibé iha fulan-setembru 2020, Dekretu-Lei ne’e hetan alterasaun dahuluk.

Nune’e, ho alterasaun daruak ba Dekretu-Lei ne’e, aumenta tan profisionál sira ne’ebé iha direitu ba hetan suplementu  remuneratóriu ne’e hanesan tékniku sira-ne’ebé partisipa iha programa vasinasaun kontra COVID-19, guarda prizionál, sira-ne’ebé servisu protesaun sívil, inklui bombeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku,  no sira-ne’ebé kuida pasiente COVID-19 sira hanesan tau matan ba  seguransa no servisu limpeza no mós sira-ne’ebé halo jestaun lixu.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here