Osan Dollar Amerikanu. Imajen/Espesiál

DILI, 15 outubru 2021 (TATOLI)–Ministériu Finansa (MF) liuhosi Sekretariadu Jestaun Fundu COVID-19, halo ona pagamentu ba pesoál liña frente ba Polísia Migrasaun hamutuk 143 ho montante $158.790, ba períodu fulan-marsu to’o juñu 2021.

“Pagamentu ami halo iha tersa (12/10),” Koordenadór Jerál Sekretariadu Tékniku Fundu COVID-19, Ernesto da Conceição Silva, relata, ba Agência TATOLI, via telefónika, sesta ne’e.

Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) no Guarda Prizionál, agora iha prosesu kompleta dokumentu sira hodi ba faze prosesa pagamentu, enkuantu Sentru Integradu Jestaun Krize (CIGC, sigla portugés) tarde liu semana oin, no ninia pagamentu prosesa ba períodu fulan-fevereiru to’o maiu 2021 (fulan-haat).

“PNTL no F-FDTL, sira hato’o ona pedidu mai ami, hafoin halo verifikasaun presiza dadus balun atu kompleta, ezemplu F-FDTL ne’e presiza hosi superiór maibé manda ona, ne’ebé téknikamente sei koordena fali ho sira, PNTL nian laiha buat ida, nune’e aprova ona tanba sira nia lista ne’e ho kedas despaixu Vise-Ministru Interiór nian maibé seidauk haruka ba banku tanba sei konfirma ho konta bankaria ne’ebé balun la loos,” Koordenadór Jerál ne’e haktuir.

Membru F-FDTL no PNTL maioria hetan, exetu sira ne’ebé maka lisensa anuál no lisensa maternidade.

Iha mós lista balun hosi funsionáriu Palásiu Prezidénsia Repúblika (PR) kuaze na’in-10, ne’ebé hirak ne’e mak durante ne’e serbisu hodi haree funsionáriu PR ne’ebé pozitivu COVID-19, tau ketak iha izolamentu Palásiu Nobre, Lahane.

Antes ne’e, instituisaun sira hanesan, Sekretaria Estadu Protesaun Sivil, servisu autoridade ka administrasaun munisipál, lista tama ona maibé presiza kompleta dokumentu balun entaun sekretariadu haruka fila lista hirak ne’e no to’o agora seidauk bele haruka filafali ba MF.

Prezidente Repúblika, Francisco Guterres Lú Olo, promulga ona altersaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira orsamentu Jerál Estadu (OJE) 2021 ramata, karik presiza hatutan suplementu ne’e ba tinan 2022, presiza iha fali Dekretu-Lei foun ida.

Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19.

Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA),Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia,  Diresaun Nasionál Seguransa Patrimóniu Públiko, no servisu autoridade ka administrasaun munisipál,  responsável ba halibur, lori no  soe lixu, sira-ne’ebé hola parte servisu autoridade ka administrasaun munisipál,  servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).

Antes ne’e, Prezidente Repúblika promulga Dekretu-Lei númeru 17/2020 loron 30 abríl, hodi fó direitu ba traballadór liña frente, atu idaidak simu mós suplementu remuneratóriu ida, ho efeitu hosi marsu 2020, maibé iha fulan-setembru 2020, Dekretu-Lei ne’e hetan alterasaun dahuluk.

Nune’e, ho alterasaun daruak ba Dekretu-Lei ne’e, aumenta tan profisionál sira ne’ebé iha direitu ba hetan suplementu  remuneratóriu ne’e hanesan tékniku sira-ne’ebé partisipa iha programa vasinasaun kontra COVID-19, guarda prizionál, sira-ne’ebé servisu protesaun sívil, inklui bombeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku,  no sira-ne’ebé kuida pasiente COVID-19 sira hanesan tau matan ba  seguransa no servisu limpeza no mós sira-ne’ebé halo jestaun lixu.

Ho alterasaun ne’e, traballadór sira-ne’ebé serbisu iha administrasaun direta ka indireta Estadu no hala’o knaar iha risku laran relasiona ho COVID-19 hosi marsu 2020, bainhira hatudu prova dokumentál, iha direitu atu hetan pagamentu suplementu remuneratóriu ba kada loron serbisu efetivu ne’ebé halo ona.

Ida-ne’e ho objetivu atu proteje direitu adquiridu hosi traballadór sira iha liña frente hosi kedas marsu 2020 mak Prezidente Repúblika veta diploma kona-ba Suplementu Remuneratóriu ne’ebé Governu hato’o iha fulan-jullu 2021.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here