Sekretáriu Estadu Ambiente, Demétrio do Amaral de Carvalho. Imajen TATOLI/António Gonçalves

DILI, 18 novembru 2021 (TATOLI)–Sekretáriu Estadu Ambiente (SEA), Demétrio do Amaral de Carvalho, kinta ne’e hasoru Primeiru-Ministru (PM), Taur Matan Ruak, hodi informa rezultadu konferénsia mudansa klimátika ba dala-26 iha Glasgow, Scotlandia.

“Konferénsia ne’e signifikadu tebes no hanesan alerta ida ba mundu, katak tranzisaun konvensionál ba ekonomia verde sai modelu ida ohin loron la’o hela, no Timor-Leste tenke hatuur-an iha prosesu ida-ne’e, katak ita tenke hahú opta konseitu dezenvolvimentu sustentável ho ambienta,” Sekretáriu Estadu hatete hafoin hasoru Xefe Governu iha Palásiu Governu.

Notísia relevante: WFP konvida komunidade timor-oan harii reziliénsia ai-han ba mudansa klimátika

Durante enkontru, governante ne’e informa ba PM kona-ba Timor-Leste nia pozisaun no mós saida mak país sira opta hasoru mudansa klimátika, nune’e bele iha estratejia ba dezenvolvimentu nasionál atu hamutuk ho país seluk enfrenta krizi klimátika globál.

Tuir Sekretáriu Estadu, krize klimátika ohin loron sai ona realidade desde 2015, ne’ebé iha deklarasaun Paris hamosu ambisaun ida atu mundu tenke mantein grau sélsiu 1,5 hosi pre-indústria nian.

“Infelizmente, hafoin tinan neen liu, nota katak hosi determinasaun kontribuisaun nasionál ne’ebé nasaun sira hatama ba konvensaun unida ba asuntu alterasaun klimátika, posibilidade to’o tinan 2030 temperatura mundu bele to’o grau sélsiu 2, se mundu nia temperature to’o ona nune’e, ita hotu sei simu centensa de morte hosi ita-nia natureza,” nia akresenta.

Hafoin partilla informasaun ne’e, PM fó hanoin atubele intensifika divulgasaun informasaun ba sosiedade, tuir prátika SEA ne’ebé tau-matan ba portofoliu asuntu klimátika.

Nune’e, SEA iha tempu badak hamutuk ho xefe delegasaun Ministériu Negósiu Estranjeiru no Kooperasaun (MNEK) sei realiza fali konferénsia ida hodi sensibiliza rezultadu konferénsia ba públiku.

“Atu informa katak mundu ohin loron iha tranzisaun hosi ekonomia konvensionál ba ekonomia verde. Ekonomia verde iha nasaun barak la’ós iha nível ida esprementál, maibé avansadu ona, ezemplu iha setór transporte, daudaun iha nasaun balun sira uza ona idrojéniu no nasaun barak iha tinan hirak ba kotuk atu karga tenke han tempu, maibé agora karreta elétriku ida bele karga de’it minutu 15 hodi bele halai to’o kilómetru 350,”  nia dehan.

Ida-ne’e, tuir governante ne’e, fó alerta ida ba Timor-Leste hanesan nasaun ida ho rezerva naturál.

“Ohin loron ita seidauk uza prezerva naturál sira. Hanesan nasaun kiik hamutuk ho nasaun sira seluk, ita insiste iha negosiasaun ba ita-nia embaixadór asuntu klimátika atu konsentra ba asuntu ne’e,” Sekretáriu Estadu tenik.

Konferénsia altu nível kona-ba mudansa klimátika hala’o iha Glasgow, Scotlandia, hahú loron 26 outubru to’o 12 novembru 2021, partisipa hosi xefe Estadu no Xefi Governu 129.

Iha ámbitu ne’e, Timor-Leste hanesan nasaun kiik hola pozisaun iha diskusaun negosiasaun komplexu inklui diskusaun seluk relasiona ho mudansa klimátika.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here