Diretór Nasionál Empregu Exteriór SEFOPE, Filomeno Soares. Imajen TATOLI/Francisco Sony

DILI, 17 novembru 2021 (TATOLI)–Diresaun Nasionál Empregu Exteriór hosi Sekretaria Estadu Formasaun Profisionál no Empregu (SEFOPE), Filomeno Soares, hateten, traballadór Austrália ne’ebé daudaun halai sees hosi sistema, sei lakon protesaun.

“Ita-nia traballadór iha Austrália hamutuk  314, sai ona hosi sistema hodi uza viza protesaun Austrália nian atu kontinua serbisu iha ne’ebá, maibé ida-ne’e risku boot ba sira tanba lakon protesaun hosi ita-nia adidu,” Diretór dehan ba Agência TATOLI, iha ninia knaar fatin, Becora, kuarta ne’e.

Tuir Filomeno Soares, viza protesaun ne’ebé traballadór timor-oan uza daudaun, loloos labele uza tanba viza ne’e aplika ba nasaun sira ne’ebé pós konflitu, maibé traballadór sira ladún iha koñesimentu di’ak.

“Daudaun sira hetan viza protesaun ne’e di’ak ona, maibé risku nafatin ba sira tanba sira-nia mobilizasaun iha nasaun laran ne’e difísil tanba ema kontrola sira,” nia akresenta.

Notísia relevante: Traballadór timor-oan na’in-300 iha Austrália sai hosi sistema

Haree ba situasaun ne’e, polítika ne’ebé Governu liuhosi SEFOPE halo mak serbisu hamutuk ho ministériu seluk hanesan Ministériu Negósiu Estranjeiru no Kooperasaun (MNEK) no adidu iha Austrália atu buka dalan rezolve problema ne’e.

“Tanba ne’e, husu ba traballadór sira ne’ebé sai hosi sistema atu filafali ba sistema, nune’e labele fó risku ba alin sira ne’ebé agora sei iha sistema no empregadór sira labele lakon konfiansa,” Diretór ne’e fó hanoin. 

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here