Diretór Jerál SEFOPE, Paulo Alves. Imajen TATOLI/Francisco Sony

DILI, 11 outubru 2021 (TATOLI)Diretór Jerál Sekretaria Estadu Formasaun Profisionál no Empregu (SEFOPE), Paul Alves, hateten, daudaun ne’e iha traballadór timor-oan iha Austrália hamutuk 300 mak halai ses hosi sistema.

“Daudaun ne’e SEFOPE planeia fali kritéria foun molok sira atu bá serbisu iha Austrália, liuhosi programa foun Pacific Labour Scheme (PLS) no Seasonal Worker Programme (SWP), ho objetivu atu evita traballadór sira sai hosi sistema,” Diretór Jerál SEFOPE informa ba Agência TATOLI, iha edifísiu Caicoli, segunda ne’e.

Notísia relevante: Traballadór timor-oan 270 iha Austrália sai hosi sistema SWP

“Traballadór ne’ebé sai hosi sistema husu Bridging Visa ka viza protesaun iha Austrália, tanba ne’e ami husu ba sira hodi halo aprosimasaun iha semana kotuk, ha’u enkontru ho asosiasaun empregadór hosi Austrália no ita propoin ba malu katak ba futuru bele buka mekanizmu di’ak ida atubele prevene traballadór sira labele sai hosi sistema,” nia akresenta.

Tuir Diretór Jerál SEFOPE, bainhira la konsege rezolve traballadór ne’ebé sai hosi sistema mak sei fó impaktu ba sira ne’ebé seidauk ba serbisu iha Austrália.

“Tanba ne’e, kritéria foun ne’ebé daudaun ne’e prepara ona ba traballadór foun sira ne’ebé sei bá Austrália mak bainhira traballadór sira to’o iha ne’ebá, sira la kaer sira-nia pasaporte rasik, maibé pasaporte sei fó ba empregadór sira mak kaer. Nune’e, ita mós iha rekezitu balun ne’ebé sei fó ba empregadór sira iha Austrália, katak bainhira traballadór sira to’o iha ne’ebá, tenke hasai sira-nia pasaporte, empregadór mak kaer de’it, nune’e evita sira aplika direitamente Bridging Visa,” Paulo Alves dehan.

Diretór Jerál ne’e argumenta, bainhira traballadór sai hosi sistema, bele fó risku ba sira-nia an no laiha seguransa karik akontese dezastre ruma.

Daudaun ne’e Governu australianu fó sai Bridging Visa ba ema sira ne’ebé loron validade viza atu hotu ona no atu halo viza foun.

“Tanba ne’e, ema ne’ebé hakarak atu hela iha Austrália liu tiha nia validade ka viza ramata mak la husu hafoun filafali viza foun, nia labele autoriza atu filafali ba Autrália durante tinan tolu to’o lima,” Paulo Alves esplika.

Bridging Visa iha tipu lima, Bridging Visa A (BVA) subclass 010, Bridging Visa B (BVB) subclass 020, Bridging Visa C (BVC) subclasa 030, Bridging Visa D (BVD) subclass 040, Bridging Visa E (BVE) subclasa 050.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here