Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

DILI, 17 novembru 2021 (TATOLI)–Ministru Koordenadór Asuntu Ekonómiku (MKAE), Joaquim Amaral, informa, Timor-Leste sei realiza fórum negósiu naun petrolíferu iha Expo Dubai.

“Ita-nia esposizasaun nafatin, informasaun sira mós nafatin iha setór petróleu no agrikultura nian. Planu tuir mai sei halo tan fórum negósiu ida entre dezembru 2021 ka janeiru 2022, eskluzivamente ba non oil,” Ministru hateten iha Palásiu Governu, kuarta ne’e.

Expo Dubai 2020 realiza iha Dubai, Emiradus Árabe Unidu, entre loron 01 outubru 2021 no loron 31 marsu 2022, ne’ebé hanesan espozisaun mundiál dahuluk iha Médiu Oriente no partisipa hosi nasaun 190-resin.

“Atividade ne’e hanesan oportunidade di’ak tanba Timor-Leste sei iha projetu lubuk ida ne’ebé Governu presiza mós investór hosi rai-li’ur, ne’ebé sei halo mós lansamentu iha fórum bussines non oil, iha kontestu Expo Dubai,” governante ne’e dehan.

Notísia relevante: Expo Dubai 2020: Kafé Timor atrai turista vizita pavillaun Timor-Leste

Prezensa Timor-Leste iha espozisaun mundiál ne’e hanesan partisipante seluk hodi aprezenta produtu no pontensialidade.

Tuir Ministru, eventu sira ne’e bele realiza kuandu vizitante sira balun hanesan investidór hetan informasaun liuhosi plataforma oinoin no iha kontaktu ho autoridade.

“Ezemplu ita-nia ema sira ne’ebé hein paviliaun, maibé kona-ba produtu, kuandu investidór iha interese, sira liuhosi dalan ne’ebé iha atu formaliza relasaun komersiál. Produtu ne’ebé interesante maka kafé orgániku, ne’ebé produtu ne’e marka diférensa hosi nasaun seluk,” Ministru tenik.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here