OÉ-CUSSE, 17 novembru 2021 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarta ne’e hatuur fatuk dahuluk ba instalasaun iluminasaun liña eletrisidade iha bairru Nitas, suku Usitaqueno, sub-rejiaun Oésilo.

“Autoridade kontente tanba mai halo lansamentu ba projetu instalasaun liña eletrisidade ba komunidade Oésilo iha Usitaqueno, tanba autoridade hakarak tinan ne’e rezolve hotu liña eletridade iha sub-rejiaun haat ba tarjetu fatin izoladu sira iha teritóriu Oé-Cusse,” Arsenio Paixão Bano informa ba jornalista sira iha suku Usitaqueno.

Nia fó sai katak, polítika ne’e autoridade atu kompleta de’it iluminasaun eletrisidade ba populasaun iha teritóriu Oé-Cusse, tanba uluk mandatu Mari Alkatiri nian rezolve ona 95%, nune’e agora atu ba 100%.

“Ha’u apelu de’it ba empreza ezekutadór sira, servisu hamutuk ho EDTL sira no komunidade, tanba autoridade hakarak iha tinan foun, komunidade bele kontente ona, tanba tinan barak moris iha nakukun,” nia apela.

Xefe suku Uistaqueno, Francisco Elo agradese ba autoridade RAEOA, tanba ba dala uluk, mandatu autoridade períodu ne’e iha inisiativa hodi rezolve ona fatin izoladu sira atubele hetan naroman.

“Fatin ida-ne’e iha perténsia Usitaqueno, viziñu ho bairru Nakone, suku Usitasa’e, fatin rua ne’e dezde tempu okupasaun to’o ohin, komunidade sei moris iha nakukun, ami promete sei serbisu hamutuk ho empreza hodi finaliza iha dezembru ne’e,” lidér lokál ne’e orgullu.

Autoridade lokál ne’e fó-sai katak, totál populasaun ne’ebé seidauk asesu ahi eletrisidade iha suku Usitaqueno hamutuk uma-kain 48 ho totál populasaun 180, komposta hosi bairru izoladu Nakome, Nitas, Katu’i no Fatu-Napan.

Entretantu, responsavél másimu ba projetu instalasaun liña eletrisidade iha sub-rejiaun Oésilo, ezekuta hosi empreza Am-Lhichoe Unipesoál Lda, ho valór kontratu $328,450.07, aloka hosi Orsamentu Jerál Estadu (OJE) 2021 ho durasaun kontratu loron 120.

Nune’e, empreza Am-Lhichoe sei halo instalasaun hosi bairru Tuapenu, Oénoah, suku Bobometo, Nakome, suku Usitasa’e, Katu’i, Nitas no Fatu-Napan, suku Usitaqueno, perténsia sub-rejiaun Oésilo, hodi rezolve benefisiáriu hamutuk uma-kain 119 ho totál populasaun hamutuk 400-resin.

Notísia relevante: RAEOA aloka millaun $1-resin instala liña eletrisidade iha sub-rejiaun haat

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here