Diretór Rejionál Infraestrutura RAEOA, Candido dos Reis Amaral. Imajen TATOLI/Abílio Elo Nini.

OÉ-CUSSE, 27 outubru 2021 (TATOLI) — Autoridade Rejiaun Administrativa Espessiál Oé-Cusse Ambeno (RAEOA) aloka millaun $1-resin ($1.225,411.07) instala liña eletrisidade iha sub-rejiaun haat iha rejiaun refere.

Alokasaun ne’e liuhosi Diresaun Rejionál Infraestrutura (DRI) ba Departamentu Eletrisidade Timor-Leste (EDTL) kona-ba projetu instalasaun liña eletrisidade iha sub-rejiaun haat tanba dook hosi rede distribuisaun enérjia.

“Rezultadu tenderizasaun projetu liña eletrisidade fó-sai ona, empreza haat mak sai manán na’in, daudaun ne’e hein karta aseitasaun kontratu ho autoridade nune’e bele simu orientasaun serbisu no bele halo ona operasaun, tanba instalasaun ne’e benefísia uma-kain 500-resin iha sub-rejiaun haat,” Diretór Rejionál Infraestrutura RAEOA, Candido dos Reis Amaral, informa ba Agência TATOLI, iha Oé-Cusse, kuarta ne’e.

Empreza haat ne’ebé maka atu halo instalasaun liña eletrisidade iha sub-rejiaun Pante Makassar, Oésilo, Nítibe no Pássabe mak hanesan; Iha Pante Makasar, ezekuta hosi empreza Grand Enclave Unipesoál sei instala hahú hosi Bubuneu, Kinloke, suku Naimeco no Lakufoan, suku Costa ho kontratu $329,849.39.

Iha sub-rejiaun Oésilo ezekuta hosi empreza Am-Lhichoe Unipesoál Lda, sei instala hosi Tuapenu, suku Bobometo, Nakome, suku Usitasa’e, Katu’i no Nitas, suku Usitaqueno ho kontratu $328,450.07.

Hosi parte sub-rejiaun Pante Makassar ezekuta hosi empreza Uma-Oli Unipesoál Lda, sei halo instalasaun hahú hosi Paineno, Oétulu, Sikone, suku Bobokase, Maonmuti, Kiupanaf, suku Cunha ho kontratu hamutuk $306,493.70

Purtantu, sub-rejiaun Nítibe ezekuta hosi empreza Elo Manu Benu Unipesoál Lda, sei halo instasalaun ba área Binaos, Kabuka Tubu, Fatusobe no Nunumtasa, suku Usitaco. Nune’e mós hosi Lelain, Taep, Bebo, Cabana, suku Suni-Ufe, inklui Hauboni, suku Taiboko, sub-rejiaun Pante Makasar, kontinua ba sub-rejiaun Pássabe sei halo instalasaun hahú hosi Bisine, Nunsena, Nun-Atais no Ato, suku Abani ho kontratu $260,617.91.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here