Diretora PNDS, Claudinha Soares Pinto. Imajen TATOLI/Arminda Fonseca

DILI, 17 novembru 2021 (TATOLI)–Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, informa, konstrusaun Uma Kbiit Laek (UKL) iha territóriu nasionál atinje ona 96%.

Benefisiáriu ba programa ne’e hamutuk 1.254, ne’ebé hosi númeru ne’e konsege konklui ona 1.192, falta 62 mak iha faze preparasaun planu aprovizionamentu atu konstrui iha tempu tuir mai.

“Ita anota katak implementadu atinje ona 96%, hela 4% mak seidauk, ne’ebé maioria hosi Rejiaun Administrativa Epesiál Oé-cusse Ambeno (RAEOA) tanba situasaun pandemia COVID-19, ne’ebé rejiaun ne’e rasik mak implementa regra konfinamentu obrigatóriu,” Diretora hateten ba Agência TATOLI, iha nia knaar fatin, Colmera, kuarta ne’e.

Notísia relevante: Konstrusaun UKL iha teritóriu nasionál atinje 11,5%

Benefisiáriu UKL iha Oé-cusse iha 34, ne’ebé foin lalais PNDS hahú ona prosesu aprovizionamentu.

“Ha’u fiar katak iha tempu badak, semana ida ka rua tan hahú ona prosesu konstrusaun,” nia tenik.

Enkuantu UKL ne’ebé konklui ona no halo ona inaugurasaun ne’e hosi munisípiu-lima hanesan Manufahi, Aileu, Liquiçá, Ermera no Dili, ne’ebé bainrua (20/07) sei halo inaugurasaun uma iha Metinaro.

“Munisípiu seluk hotu ona, ne’ebé iha ona faze terminasaun no hein atu halo inaugurasaun, maibé ita sei haree jestaun tempu, nune’e bele entrega uma sira, tanba inaugurasaun iha nível nasionál sei realiza iha munisípiu hotu,” nia akresenta.

Durante ne’e komununidade antusiazmu ba implementasaun programa UKL iha terrenu, tanba rezultadu ne’ebé iha, hahú hosi sosializasaun to’o konstusaun uma.

“To’o agora ita la hetan reklamasaun barak hosi komunidade, tanba programa PNDS ne’e komunidade rasik mak jere no sira rasik mai sai benefisiáriu ba programa ne’e,” nia tenik.

Maski nune’e, dezafiu ne’ebé daurante ne’e PNDS hasoru durante implementasaun maka iha situasaun COVID-19 no estrada tanba maioria benefisiáriu dook hosi villa.

“Ita-nia polítika katak harii uma tenke halo duni iha benefisiáriu nia fatin, entaun hosi UKL 62 ne’ebé seidauk konstrui, uma 34 iha Oé-cusse no restu ne’e ba munisípiu sira hanesan Baucau, Lautém, Covalima, no Viqueque,” Claudinha Soares dehan.

Esforsu ne’ebé PNDS halo hodi responde ba problema sira ne’e maka halo ona koordenasaun ho Institutu Jestaun Ekipamentu (IGE, sigla portugés) atu loke dalan iha suku sira ne’ebé estrada ladi’ak, nune’e konstrusaun uma bele la’o tanba tuir planu, to’o tinan ne’e nia rohan tenke ramata konstrusaun uma ne’ebé define ona.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here