Progresu konstrusaun UKL iha Suku Lahomea, Postu Administrativu Maliana, Munisípiu Bobonaro, segunda (09/08). Imajen Tatoli/Sérgio da Cruz.

BOBONARO, 06 setembru 2021 (TATOLI)—Dadus hosi Sekretariadu Tékniku Programa Nasionál Dezenbolvimentu Suku (PNDS), hatudu katak, progresu konstrusaun ba Uma Kbiit Laek (UKL) iha territóriu nasionál atinje ona 11,5%.

“Jeralmente dadus ne’ebé ha’u foti iha semana kotuk, iha ona 11,5%. Ne’e totalmente hosi munisipiu 12 inklui RAEOA. Maibé iha munisípiu balun postu administrativu ida de’it ninia atinjimentu ne’e to’o ona 75%, balun atu konklui ona,” Diretora Sekkretariadu Tékniku PNDS, Cluadina Soares Pinto, hateten ba jornalista-sira, iha salaun administrasaun munisipál Bobonaro, segunda ne’e.

Notísia relevante:PNDS sei loke kotasaun ba projetu UKL

Kontrusaun UKL iha territóriu nasionál hatudu progresu di’ak, maibé iha munisípiu balun mak atrazu oitoan no seidauk bele implementa hotu, tanba kestaun Covid-19 no mudansa klimátika.

Hosi persentajen ne’ebé iha, hatudu katak, PNDS implementa no konstrui ona uma 800-resin falta de’it unidade 303 Dili implementa hela konfinamentu domisiliáriu jerál maski hahú ona prosesu aprovizionamentu.

“Entaun, fornesedór-sira labele ba hola material no balun mós razaun tanba iklimátika, entaun ida-ne’e difísil atu asesu ba to’o suku,” nia subliña.

Iha munisípiu Ermera mak projetu ne’e implementa hotu ona iha suku 54, maibé ninia persentajen mak sei natón.

Kona-bá munisípiu  seluk ne’ebé iha implementasaun projetu hasoru difikuldade kona-bá bee, Diretora ne’e promete sei koordena ho parte Serbisu Agua no Saneamentu (SAS) atu fornese bee, nune’e bele aselera serbisu hodi konklui tuir kontratu ne’ebé iha.

Tuir kapasidade orsamentál iha tinan fiskál 2021, Governu sei hari’i UKL hamutuk 1.254 iha 424 suku ho totál orsamentu millaun $25 no kustu ba kada uma entre $14.000 to’o $17.000.

Uma ne’ebé konstrui kompostu hosi tipu ka medida rua, tipu 48m2 ne’ebé inklui kuartu tolu, sala vizita ida no dapur, tipu 37 m2 ne’ebé sei inklui kuartu rua, kompletu ho sala vizita ho kuzi~na.

Konstrusaun ne’e UKL ne’e korresponde ho Planu Estratéjiku Dezenvolvimentu Nasionál (PEDN) 2011-2030 ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no moris diak.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here