Ekipa saneamentu sira raut hela foer iha Kapital Dili. Imajen Tatoli/Antonio Goncaalves.

DILI, 16 novembru 2021 (TATOLI)—Governu liuhosi Autoridade Munisípiu Dili, tinan ne’e kontinua kontrata kompañia lima hodi transporta lixu hosi Dili ba fakar iha lixeira Tibar-Liquiça.

Notísia Relevante: Fevereiru, SMD entrega kamioneta 49 ba kompañia lima atu rekolla lixu

“Iha tinan 2021, ita kontinua kontrata kompañia lima ho kamioneta hamutuk 49 hodi rekolla lixu sira iha Díli hodi lori ba soe iha lixeira Tibar,” Sekretáriu Autoridade Munisípiu Dili, António Moniz Clau, hateten ba Agência Tatoli, iha nia knaar fatin, Dili, ohin.

Montante orsamentu ba kontrata kompañia lima iha tinan ne’e hamutuk $1,164,710.00, no hosi orsamentu ne’e sei selu ba kompañia sira hosi loron 3.66 ho montante kada loron $65.

Nia esplika, iha kompañia lima ne’ebé Autoridade Munisípiu Dili kontrata mak hanesan Labilay Lda, Avo Lala Lda, Jacrilo Lda, Felipra Lda no Lorison Lda, no komapñia sira-ne’e mak oferese kamioneta hodi tula sai lixu hosi Dili.

“Kamioneta sira-ne’e la’os Autoridade Munisípiu Dili mak kontratu, maibé ita halo kontratu ho kompañia lima no kompañia sira-ne’e mak halo kontratu filafali ho kamioneta hamutuk 49 hodi tula lixu” nia informa.

Konaba transporta lixu, nia esplika, kompañia liuhosi kamioneta sirane’e rekolla lixu hahú hosi tuku 04h00 dadeersan to’o tuku  17h00 no kada loron sira rekolla retajen dala tolu.

“Retajen dala tolu hanesan dala ruma foer barak liu sira halo hotu iha tuku 13h00 to’o 14h00 lorokraik. Maibé, se foer uitoan, entaun iha tuku 11h00 ka 12h00, sira halo servisu hotu ona. Maibé agora atu tama ona iha tempu udan volume lixu sa’e makaas, dala ruma sirania retajen bele to’o iha tuku 13h00 ka 14h00 lorokraik,” nia afirma.

Ba loron servisu hanesan iha loron segunda to’o sesta, sirania retajen dala tolu maibé iha loron sabádu no domingu inklui loron feriadu nasionál sira-ne’e, sira-nia servisu ho retajen dala rua.

Entretantu, kompañia lima ne’ebé kontratu kamioneta hamutuk 49 mak responsavél ba jestaun lixu iha munisípiu Dili, hanesan iha postu administrativu Cristo Rei toma konta hosi kompañia Avo Lala Lda ho kareeta hitu (7), Na’in Feto toma konta hosi kompañia Labilay Lda ho karreta 10.

Iha post administrativ Vera Cruz toma konta hosi kompañia Jacrilo Lda ho kaereta sia (9) no Dom Aleixo hosi kompañia rua hanesan kompañia Lorison Lda ho karreta 11 no Felipra Lda ho kaereta 12.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here