Ekipa Saneamentu Dili kontinua rekolla lixu iha dalan públiku sira. Imajen TATOLI/Joanico de Araújo.

DILI, 11 fevereiru 2021 (TATOLI)–Xefe Departamentu Saneamentu Munisípiu Dili, Domingos dos Santos Soriano, hateten iha fevereiru ne’e Saneamentu Munisípiu Dili (SMD) entrega kamioneta 49 ba kompañia lima hodi halo operasaun ka rekolla lixu iha Kapitál Dili.

Notísia Relevante: Dekretu-lei 33/2008 kona-ba Ijiene no Órden Públika seidauk aplika

“Iha fevereiru tinan ne’e, ita fó kamioneta 49 ba kompañia lima mak utiliza no jere hodi rekolla lixu iha área Dili nian,” Domingos dos Santos Soriano hateten ba Agência TATOLI iha nia knaar fatin, Matadouro, Dili, kinta.

Nia informa, kompañia rua ne’ebé mak kobre iha Postu Administrativu Dom Aleixo nian mak Larison Lda ho kamioneta 11 ba Lot A no Felipra Lda ho kamioneta 11 ho Lot B.

Kompañia sira-ne’ebé mak kobre Postu Administrativu Vera Crus mak Kompañia Sakrilo Lda ho kamioneta 10 no Kompañia Labilay Lda ho kamioneta 10 hodi kobre Postu Administrativu Nain Feto, no Kompañia Abolala Lda ho kamioneta 07 mak kobre iha Postu Administrativu Cristo Rei.

Hosi kamioneta 49 ne’e, nia dehan, sira hahú kobre hodi rekolla lixu hosi segunda to’o sábadu, eseptu domingu mak rekolla lixu ho loron sorin. Nia dehan, to’o agora ekipa saneamentu ne’ebé mak rekolla lixu iha Sidade Dili hamutuk na’in-196.

“Ami-nia ekipa rekolla lixu ho kamioneta ba kada loron ida, kamioneta ida tenke tula dala tolu hafoin para. Maibé, to’o agora, ami seidauk hatene sura lixu nia tonelada tanba ita seidauk iha mákina tetu lixu nian,” nia hateten.

 Lixeiru Tibar-Metinaro

Xefe Departamentu Saneamentu Munisípiu Dili ne’e haktuir, lixeiru Tibar eziste dezde tempu Indonézia nian no to’o agora sei kontinua utiliza nafatin hanesan lixeiru.

“Iha tempu Indonézia mak autoridade sira sosa hela rai (lixeiru Tibar) ne’e iha tinan 1996, ne’ebé iha momentu ne’ebá uza to’o agora. Iha biban ne’ebá, Administradór Munisípiu Dili ho Liquiça nian mak koopera hamutuk hodi deside tau lixu iha lixeiru Tibar,” Domingos Soriano hateten.

Maibé, nia dehan, tanba ikus ne’e mautensaun ne’ebé ladún di’ak iha lixeiru Tibar, entaun komunidade Tibar mós halo protesta makaas atu taka lixeiru Tibar tanba lixu ne’ebé hosi Dili ba tau iha ne’ebá ne’e afeta ba sira-nia saúde.

“Ho preokupasaun ne’e, antes ne’e, ita-nia Prezidente Autoridade Munisípiu Dili nian haree, no agora esforsu hela buka fatin iha Metinaro tanba Metinaro mós pertense hela mai área Dili nian. Ita hetan ona fatin rua iha Metinaro, fatin ida ba atu halo ba semitériu no ida halo sai lixeiru,” nia informa.

Tuir nia, lixeiru ne’e agora daudaun iha hela prosesu nia-laran no garante katak sei hamamuk fatin ne’ebá hodi komunidade labele impede bainhira lori lixu ba fakar iha lixeiru ne’e.

“Fatin Metinaro atu utiliza ba fatin lixeiru ne’e kompeténisa Governu nian, hein de’it Governu aprova ona orsamentu fatin ne’ebá nian mak parese tinan oin mai, ita mós bele uza ona. Fatin ne’ebé iha Metinaro atu utiliza ba lixeiru maizumenus 8-10 ektare,” nia informa.

Fatin lixeiru Metinaro ne’ebé mak Governu planea ne’e iha edifísiu Forsa-Falintil Defeza Timor-Leste (F-FDTL) nia kotuk parte ba loromonu nian, no parte Administradór Matinaro nian mós halo ona sensibilizasaun ba komunidade sira iha parte ne’ebá.

Jornalista: Osória Marques

Editór: Cancio Ximenes  

HAKEREK NO HATÁN

Please enter your comment!
Please enter your name here