Ministru Koordenadór Asuntu Ekonómia Joaquim Amaral (MKAE), akompaña hosi Adjunta Embaixadór Austrália ba Timor-Leste, Suzy Wilson-Uilelea no Sekretáriu Estadu Profisionál no Empregu (SEFOPE), Alarico do Rosário, halo abertura ba formasaun preparatóriu kandidatu traballadór timor-oan bá Austrália, iha Sentru Formasaun Tibar, segunda (15/11). Imajen TATOLI/Arminda Fonseca

LIQUIÇÁ, 15 novembru 2021 (TATOLI)–Sekretaria Estadu Formasaun Profisionál no Empregu (SEFOPE) iha segunda ne’e, realiza seremónia abertura formasaun preparatóriu ba kandidatu traballadór timor-oan hamutuk 40 molok bá serbisu iha Austrália.

Diretór Sentru Formasaun Tibar, Simão Tito Barreto, hateten, objetivu formasaun ne’e atu prepara joven sira hodi hatene lala’ok serbisu iha Austrália.

“Programa ne’e ita kolabora ho parseiru dezenvolvimentu The Departament of Foreign Affairs and Trade (DFAT) liuhosi programa Worley Parsons Timor-Leste (WPTL), hamutuk ho ita-nia Diresaun Nasionál Exteriór SEFOPE, prepara ita-nia kandidatu traballadór Austrália hamutuk na’in-40, ne’ebé naran tama ona iha sistema,” Diretór dehan iha Sentru Formasaun Tibar.

Notísia relevante: Traballadór timor-oan bá serbisu iha Austrália tenke kompleta vasina

Formasaun sei realiza durante fulan-ida no durante formasaun kandidatu sira sei aprende disiplina serbisu, kultura, no mentalidade atu kompleta abilidade ne’ebé iha ona.

“Formasaun ne’e ita hahú iha munisípiu Liquiçá no ba oin sei ba fali munisípiu sira seluk tanba naran iha hotu ona sistema,” nia akresenta.

Iha sorin seluk, Diretór Nasionál Empregu Exteriór SEFOPE, Filomeno Soares, hateten, inisiativa hala’o atividade ne’e tanba bazeia ba planu anuál ba tinan ne’e, ne’ebé deskreve katak sei haruka traballadór timor-oan bá Austrália. 

“Planu ba tinan 2022 ita sei prepara kandidatu traballadór hamutuk 3.000 bá Austrália, entaun bazeia ba informasaun sira ne’e mak ita tenke prepara kandidatu sira molok arranka, tanba daudaun ne’e bazeia ba ita-nia baze dadus ne’ebé iha, kandidatu traballadór hamutuk 15.000, hosi munisípiu 12 inklui Rejiaun Administrativu Espesiál Oé-usse Ambeno (RAEOA),” nia informa.

Nune’e mós, Ministériu Koordenadór Asuntu Ekonómiku, Joaquim Amaral, konsidera programa ne’e importante hodi hasa’e koñesimentu kandidatu traballadór.

“Husu ba kandidatu traballadór sira tenke aproveita didi’ak formasaun ne’e, nune’e bele kompreende regra Austrália ninian. Tanba ne’e, ita tenke hatoman-an bainhira ba ema-nia rai, tenke kuidadu sasán ne’ebé ita uza,” governante ne’e fó hanoin.

Ministru husu joven sira uza oportunidade ne’e ho di’ak tanba Governu loke ona dalan hodi prepara bá serbisu iha rai-li’ur.

Austália sei loke oportunidade liután ba timor-oan ba serbisu

Iha sorin seluk, Adjuntu Emabaixadór Austrália ba Timor-Leste, Suzy Wilson-Uilelea, hateten, Governu Austrália sei fó fali oportunidade ba traballadór timor-oan ba serbisu iha Austrália tanba númeru taxa vasina entre nasaun rua ne’e hahú sa’e.

“Ita hatene pandemia COVID-19 iha impaktu substansiál atu mobiliza traballadór sira ba serbisu, maibé ho aumenta taxa vasinasaun iha Timor-Leste no iha Austrália, empregadór sira hakarak atu haree timor-oan sira bá serbisu,” Reprezentante Embaixada dehan.

Tuir Suzy Wilson-Uilelea, mobilidade entre país rua iha potensialidade boot ba futuru hodi aumenta nível kualifikasaun ba populasaun, liuliu dezenvolvimentu sosiál no ekonómiku, tanba ne’e tempu di’ak atu prepara traballadór sira ne’ebé prontu ona atu hasoru demanda traballu hosi to’os-na’in no otél sira iha Austrália.

“Formasaun ne’e hasa’e kualidade preparasaun traballadór ba mobilidade laborál iha sistema Training System in Timor-Leste, liuhosi kursu formasaun akreditadu, tanba importante tebes no asesível ba SEFOPE no traballadór sira. Ida-ne’e inovasaun boot atu hatudu Timor-Leste ninia dedikasaun atu sustenta hadi’a no hasa’e reputasaun iha mobilidade laborál, ” nia akresenta.

Adjunta Emabixadór Austrália ne’e orgullu atu kontribui ba inisiativa sira hodi haforsa abilidade foin-sa’e timor-oan sira liuhosi hadi’a kualidade fasilidade formasaun, kuríkulu no halo koordenasaun iha setór TVET.

“Kursu preparasaun mobilidade laborál ne’e hanesan ezemplu ida ba Austrália nia investimentu no kompromisu hodi kontribui ba susesu foin-sa’e timor-oan atu kompete serbisu iha internasionál no rai-laran,” nia subliña.

Nune’e, Reprezentante Embaixada Austrália apela ba kandidatu traballadór ne’ebé sei tuir formasaun atu aproveita didi’ak oportunidade, nune’e bele atinje mehi ne’ebé durante ne’e iha.

Jornalista : Arminda Fonseca

Editora     : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here