Diertór Jerál SEFOPE, Paulo Alves. Imajen TATOLI/Francisco Sony

DILI, 06 agostu 2021 (TATOLI)—Diretór Jerál Empregu Sekretaria Estatadu Formasaun Profisionál Empregu (SEFOPE), Paulo Alves, informa, traballadór timor-oan sira ne’ebé atu ba serbisu iha Austrália tenke kompleta vasina prevensaun COVID-19.

“Timor-Leste fulan hirak liubá númeru kazu COVID-19 aumenta, ho ida-ne’e maka Governu australianu aumenta tan kritériu katak traballadór hotu ne’ebé atu bá serbisu iha Austrália tenke kompleta vasina (doze daruak),” Diretór Jerál Empregu, hateten, iha salaun SEFOPE, Caicoli, sesta ne’e.

Hafoin Governu australianu fó sai kritériu foun, parte Sekretaria Estadu hosi Departementu Empregu Exterior fó sai avizu ba traballadór ne’ebé naran iha ona sistema baze dadus, atu kumpre rekezitu.

“Hafoin ita bele aborda iha ita-nia dadus, nune’e kompañia ruma presiza ema atu serbisu, ita oferese de’it ema sira ne’ebé kompleta ona kritériu foun,” nia akresenta.

Tuir Diretór, avizu ne’e fó sai antes ona tanba nota katak kandidatu traballadór ba Austrália balun seidauk kompleta vasina.

Tuir dadus SEFOPE, hosi tinan 2014 to’o 2018, timor-oan hamutuk 2.819 maka serbisu ona iha Austrália liuhosi programa sazonál iha área ospitalidade no ortikultura no konsege rekolla retornu $9.698.579,15 mai Timor-Leste.

Iha loron 02 dezembru 2020, traballadór timor-oan na’in-152 hosi programa sazonál aranka ba Tasmánia, Austrália hodi serbisu.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here