Governu Timor-Leste no parseiru hala’o enkontru ho parseiru internasionál kona-ba tráfiku umanu, iha Rezidénsia Farol, segunda (15/11). Imajen TATOLI/Francisco Sony

DILI, 15 novembru 2021 (TATOLI)—Governu liuhosi Ministériu Interiór (MI), Prezidénsia Konsellu Minustru (PCM, sigla portugés), hamutuk ho parseiru internasionál hanesan Organizasaun Internasionál Migrasaun (IOM, sigla inglés), Organizasaun Nasaun Unida (ONU), no ekipa Embaixada Austrália, halo enkontru hodi tau hanoin hamutuk luta hasoru krime tráfiku umanu.

“Primeiru-Ministru konvoka reuniaun hodi tau no fahe hanoin hamutuk iha asaun konkreta ne’ebé di’ak liu atubele tau di’ak esforsu Estadu Timor-Leste ho parseiru sira iha kontestu luta hasoru tráfiku umanu,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun iha Rezidénsia Ofisiál Farol, segunda ne’e.

Notísia relevante: Governu diskute planu estabelesimentu Komisaun prevensaun tráfiku umanu

Portavóz Governu ne’e konsidera, tráfiku umanu nu’udar krime globál ne’ebé tenke hetan atensaun ho esforsu boot, liuhosi nasaun sira hotu iha mundu.

Aleinde ne’e, Governu rekoñese atividade ilegál ne’e hanesan dezafiu boot ba Timor-Leste tanba bele fó ameasa ba país, liga ho krime organizadu.

“Iha diskusaun, ninia objetivu maka haree komponente no departamentu hosi Governu idaidak bele aumenta esforsu hodi hetan rezultadu másimu. Aleinde ne’e iha aprosimasaun ida katak Governu tomak bele halo esforsu ne’ebé di’ak liu iha luta kontra tráfiku umanu,” nia argumenta.

Enkontru ne’e foku liu ba knaar MI, ne’ebé diskute kona-ba papél saida mak ministériu bele halo inklui nia medida sira, ho kolaborasaun parseiru atubele responde ba dezafiu tráfiku umanu.

Departamentu MI hanesan parte integradu iha komisaun interministeriál ida ne’ebé mak harii ona, ne’ebé lidera hosi Ministériu Justisa, sei koordena esforsu hotu ho departamentu Governu hodi bele prodúz planu asaun nasionál ida iha tempu mai.

Daudaun ne’e halo hela asaun imediatu ho MI ein kolaborasaun ho parseiru internasionál sira no ninia departamentu relevante sira.

MI ein kolaborasaun ho IOM prepara nota konseitu ida ba atuasaun imediata durante fulan-lima nia laran iha kontestu ámbitu kompeténsia MI nian.

“Espera katak hafoin fulan-lima ne’e ramata bele iha sinerjia katak esforsu kiik sira sei suli hamutuk sei sai mota boot ida ne’ebé maka sei rezulta esforsu integradu Governu,” nia akresenta.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here