Pesoál saúde halo atendimentu ba komunidade ne’ebé atu halo swab teste iha Sentru Konvensaun Dili, segunda (27/09/21). Imajen TATOLI/António Gonçalves

DILI, 11 novembru 2021 (TATOLI)–Koordenadór Sekretariadu Tékniku Fundu COVID-19, Ernesto da Conceição Silva, hateten, pagamentu suplementu remuneratóriu ba pesoál liña frente hahú hosi fevereiru to’o dezembru, bazeia ba dekretu-lei ne’ebé promulga ona hosi Prezidente Repúblika.

“Dekretu-lei númeru 13 ne’e hateten pagamentu suplementu remuneratóriu ba pesoál liña frente to’o loron 31 dezembru 2021, la to’o tinan 2022, ne’ebé informasaun balun espalla katak sei selu to’o abríl tinan oin ne’e la loos,” Koordenadór Sekretariadu Tékniku hateten ba Agência TATOLI, via telefónika, kinta ne’e.

Aleinde ne’e, parte Sekretariadu seidauk simu lista liña frente hosi Ministériu Saúde (MS), maibé iha ona informasaun hosi Diretór Jerál katak sira sei submete iha tempu badak, maski antes ne’e Sekretariadu Tékniku hato’o ona karta notifikasaun ba liña ministeriál ne’ebé envolve pesoál iha mitigasaun COVID-19, atu submete pedidu inklui anexa dekretu-lei númeru 13.

“Pedidu ne’e submete tarde liu molok loron 17 dezembru, tanba tuir dekretu Governu kona-ba ezekusaun orsamentu 2021 ne’e, prazu ba kria Commitment Payment Voucher (CPV) to’o de’it loron 17 dezembru no loron submete ikus liu ba Ministériu Finansa to’o 23 dezembru,” nia esplika.

Kona-ba períodu pagamentu, Sala Situasaun, Sentru Integradu Jestaun Krize (CIGC, sigla portugés) reativa iha fevereiru 2021, maibé iha fulan hirak iha tinan 2020 dezmantela tiha.

Notísia relevante: MF Hasoru Difikuldade Define Ekipa Liña Frente Tanba Sala Situasaun Dezmantela Ona

“Tanba saida mak períodu pagamentu la hanesan, tanba dekretu-lei ne’e hateten katak ba pesoál sira ne’ebé envolve direta iha atividade prevensaun no mitigasaun ne’e tenke hetan despaixu hosi jestór másimu, ne’ebé sira-nia jestór másimu hato’o ba sira sa fulan, sé hatún iha fulan-marsu entaun validasaun ne’e iha marsu tanba dekretu-lei ne’e hateten bazeia ba despaixu,” nia akresenta.

Koordenadór dehan, kona-ba instituisaun sira ne’ebé MF halo ona pagamentu ba fulan tolu ka haat, bele submete filalfali pedidu tanba dekretu-lei ne’e hateten hahú fevereiru to’o dezembru.

“Maibé iha fulan-outubru ne’e Governu levanta ona konfinamentu obrigatóriu jerál no serka sanitária, maski atividade prevensaun no mitigasaun kontinua la’o maibé númeru menus,” nia tenik.

Daudaun ne’e, pedidu pagamentu ne’ebé sei iha Sekretariadu Tékniku maka Servisu Prizaun, Autoridade Aduaneira/Alfándega, no Autoridade Inspesaun no Fiskalizasaun ba Atividade Ekonómika no Sanitária (AIFAESA), maibé instituisaun seluk seidauk.

Enkuantu, MF liuhosi Sekretariadu Tékniku Fundu COVID-19 iha loron 09 novembru 2021 halo ona pagamentu suplementu remuneratóriu ba FALINTIL Forsa Defeza Timor-Leste (F-FDTL) ne’ebé konsidera hanesan liña frente hamutuk 2.100 ho montante millaun $6,4.

Notísia relevante: MF realiza pagamentu suplementu remuneratóriu ba membru F-FDTL hamutuk 2.100

Iha outubru nia rohan, MF realiza ona pagamentu suplementu remuneratóriu ba membru Polísia Nasionál Timor-Leste (PNTL) hamutuk 3.821 ho montante millaun $5,1.

Halo mós pagamentu ba pesoál CIGC hamutuk na’in-449 ho montante $322.925, iha loron 18 outubru inklui membru Polísia Migrasaun hamutuk 143 ho montante $158.790.

Nune’e, to’o iha loron 08 novembru 2021, MF ezekuta ona pagamentu suplementu remuneratóriu liña frente ho montante milliaun $12,7 ka 25%, hosi orsamentu alokadu hamutuk milliaun $51,9.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here