Ministru Finansas, Fernando Hanjam hasoru malu ho Primeiru-Ministru, Taur Matan Ruak, iha Palásiu Governu. Imajen Tatoli/Egas Cristovão

DILI, 13 jullu 2020 (TATOLI) – Ministériu Finansa (MF), liuhosi Konsellu Jestaun Fundu COVID-19 ne’ebé mak jere orsamentu COVID-19 nian hodi responde ba medida sira ne’ebé Governu liuhosi Konsellu Ministru (KM) aprova ona, daudaun ne’e hasoru difikuldade atu define ekipa liña frente atu halo pagamentu suplementu remuneratóriu.

Antes ne’e, proposta husi kada ministériu tama hotu ihaSala Situasaun, Sentru Integradu Jestaun Krize (CIGC, sigla portugés) hodi koordena ho Konsellu Jestaun Fundu COVID-19 ba ezekusaun fundu, maibé iha loron 30 juñu Primeiru-Ministru, Taur Matan Ruak ofisialmente dezmantela CIGC tanba Timor-Leste la rejista ona kazu konfirmadu surtu COVID-19.

Notísia Relevante: PM Taur Enserra Sala Situasaun Maibé Gabinete Jestaun Krize Kontinua Funsiona

Ministru Finansa, Fernando Hanjam, hateten pagamentu suplementu remuneratóriu ba ekipa liña frente, Sala Situasuan maka tenke define maibé bainhira entidade ne’e laiha ona entaun difikulta Konsellu Jestaun Fundu hodi prosesa pagamentu, tanba ne’e nia parte hasoru malu ho Primeiru-Ministru (PM), Taur Matan Ruak hodi hamutuk buka solusaun.

“Ámbitu Estadu Emerjénsia, iha Sala Situasaun hamutuk ho Konsellu Jestaun Fundu COVID-19 nian hodi jere atividade sira no ninia kabimentu orsamentu. Ami-nia difikuldade tanba Sala Situasaun ne’e dezmantela ona, iha momentu seidauk, bainhira dokumentu sira ne’ebé tama ba Konsellu Jestaun tenke submete uluk ba iha Sala Situasaun hodi hetan aprovasaun mak foin bele lori ba iha Sekretáriadu Konsellu Jestaun Fundu hodi halo pagamentu”, hateten Fernando Hanjam hafoin ramata reuniaun ho PM Taur iha Palásiu Governu, segunda ne’e.

Tuir governante ne’e, ekipa jurídiku sira sei túr filafali hodi deskute asuntu ne’e tanba iha ligasaun ho parte legál sira.

Suplementu remuneratóriu ne’ebé presiza validasaun hosi Sala Situasaun nian maka balun hosi proposta Ministériu Saúde ba profisionál saúde sira no proposta husi Ministériu Administrasaun Estatál ba ekipa água no saneamentu.

“Presiza validasaun hosi Sala Situasaun, nune’e kuandu Konsellu Jestaun Fundu prosesa pagamentu mós labele mosu fallansu ruma, tanba ne’e tenke define loloos sé mak iha nível liña frente no sé mak liña segundu. Atu define sira ne’e, desizaun tenke maihusi Sala Situasaun. Ha’u relata ona preokupasaun ne’e ba Primeiru-Ministru hodi ami hamutuk buka solusaun,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here