Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, kinta (11/11). Imajen TATOLI/Francisco Sony

DILI, 11 novembru 2021 (TATOLI)—Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, aprezenta Projetu Rezolusaun Governu iha reuniaun Konsellu Ministru (KM), kona-ba Estratejia Nasionál ba Protesaun Sosiál ba períodu tinan 2021-2030, ne’ebé hetan ona aprovasaun.

“Objetivu aprovasaun estratejia ne’e atu promove evolusaun integrada huosi sistema protesaun sosiál, hodi haluan ninia kobertura no alkansa, nune’e bele masimiza ninia impaktu iha hamenus kiak no vulnerabilidade,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kinta ne’e.

Notísia relevante: Governu aprova dekretu-lei haat hosi MSSI

Nune’e, estratejia ne’e atu konsolida direitu sira ba seguransa sosiál no ba asisténsia sosiál, inklui asesu ho forma ne’ebé inkluziva ba servisu sosiál, ba edukasaun no saúde.

Estratejia Nasionál Protesaun Sosiál estabelese hanesan objetivu estratéjiku, hamenus kiak, hadi’a no haluan seguransa sosiál ba traballadór sira no dezenvolvimentu institusionál.

Antes ne’e, iha setembru 2020, Governu estabelese fundu rezerva ba seguransa sosiál no ba definisaun modelu jestaun rasik, ho objetivu atu asegura no iha ligasaun direta ho estabilizasaun finanseira no sustentabilidade hosi rejime kontributivu seguransa sosiál, ne’ebé verba hosi fundu sei foti hosi seguransa sosiál no sei la konsidera nu’udar fundu públiku.

Iha tinan 2020, Institutu Nasionál Seguransa Sosiál (INSS) rejista funsionáriu públiku no traballadór setór privadu pur volta 100.000.

Dekretu-lei númeru 47 mensiona katak kontribui ba seguransa sosiál ne’e hamutuk 10%, ne’ebé kompostu hosi 4% maihosi traballadór no 6% maihosi empregadór.

Nune’e, bainhira kada fulan simu saláriu, seguransa sosiál sei ko’a osan 4% hosi traballadór no 6% kontribui hosi empregadór.

Jornalista : Antónia Gusmão

Editora     : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here