Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (20/10). Imajen TATOLI/Francisco Sony

DILI, 20 outubru 2021 (TATOLI)—Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, aprezenta projetu dekretu-lei haat iha reuniaun Konsellu Ministru (KM) ordinária kuarta ne’e, no hetan aprovasaun.

Dekretu-lei hirak ne’e mak hanesan alterasaun dahuluk ba dekretu-lei númeru 20/2017, loron 24 fulan-maiu, ne’ebé aprova rejime inskrisaun no obrigasaun kontributiva iha ámbitu rejime kontributivu seguransa sosiál.

“Projetu dekretu-lei ne’e, ninia objetivu atu extende rejime ne’e ba grupu traballadór foun sira, korije aspetu balu iha baze insidénsia kontributiva no haluan númeru eskalaun adezaun fakultativa, asegura protesaun no enkuadramentu traballadór hodi halo atividade profisionál temporáriamente iha estranjeiru, garante tratamentu hanesan ba traballadór hotu liuhosi halakon norma ne’ebé impoin plafond kontribuisaun ne’ebé tenke selu, ne’ebé ninia benefísiu ba traballadór sira ne’ebé ho kontratu termu sertu iha Administrasaun Públika,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu.

Aleinde ne’e, alterasaun dahuluk ba dekretu-lei númeru 17/2017, loron 24 maiu no ba dekretu-lei númeru 19/2017, loron 24 maiu, ne’ebé aprova rejime jurídiku kona-ba pensaun ba invalidéz no ferik-katuas, no rejime jurídiku prestasaun bainhira ema mate iha ámbitu rejime kontributiva seguransa sosiál.

“Projetu dekretu-lei ne’e ho objetivu atu garante prinsípiu báziku rejime kontributiva, ne’ebé asosia ho dever atu kontribui ba direitu hodi simu prestasaun sosiál, regula formula kálkulu kona-ba pensaun invalidéz no ferik-katuas ba traballadór sira ne’ebé parsialmente abranje hosi rejime tranzitóriu (ho direitu iha formasaun), asegura katak ema ne’ebé kontribui ba rejime jerál ne’e sei hetan direitu ba pensaun ne’ebé boot liu hosi valór subsídiu apoiu ba ferik-katuas no inválidu sira, no Klarifika tratamentu ne’ebé atu fó ba ema bainhira mate ba efeitu seguransa sosiál .

Aprovasaun datoluk mak hanesan alterasaun dahuluk ba dekretu-lei númeru 19/2008, loron 19 juñu, ne’ebé aprova subsídiu apoiu ba idozu no inválidu sira.

“Ho konsiderasaun katak, bainhira diploma legál ne’ebé refere tiha ona tama iha vigór, seidauk iha rejime seguransa sosiál seluk iha Timor-Leste, ho konsiderasaun katak rejime kontributivu seguransa sosiál nian, ho objetivu hakarak atu revee no adapta regra jerál kona-ba akumulasaun hosi benefísiu sira, atu nune’e dekretu-lei ne’e bele sai justu ba sosiedade,” Portavoz Governu esplika.

Nune’e mós, alterasaun dahuluk ba dekretu-lei númeru 55/2020, loron 28 outubru, ne’ebé aprova konstituisaun Fundu Rezerva ba Seguransa Sosiál (FRSS) no definisaun modelu jestaun nian. 

Notísia relevante: INSS seidauk implementa fundu rezerva seguransa sosiál

Ho projetu Dekretu-Lei ne’e, hakarak atu halo alterasaun ba limite investimentu iha asaun no dívida privada, hodi asegura ‘karteira referénsia’ ne’ebé efetivamente kumpre objetivu FRSS no aumenta marjen liberdade atuasaun Governu anualmente tuir komportamentu ekonomia no merkadu nian.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here