Komemorasaun tinan-30 Masakre (12 novembru 1991) Santa Cruz no tinan-16 Loron Nasionál Juventude. Imajen/GPM

DILI, 11 novembru 2021 (TATOLI)–Primeiru-Ministru (PM), Taur Matan Ruak, konsidera komemorasaun tinan-30 Masakre Santa Cruz, iha loron 12 novembru, nu’udar reflesaun ba foin-sa’e sira ne’ebé foin boot iha era independénsia.

“Ita-nia Governu deside loron ne’e nu’udar Loron Nasionál ba Juventude, hodi fó onra ba joven feto no mane ne’ebé masakradu iha loron ne’e, inklui loron ne’e nu’udar reflesaun ba foin-sa’e sira ne’ebé foin boot iha era independénsia atu tuur hodi reflete saida mak ha’u bele fó ba ha’u-nia nasaun no saida mak ha’u bele halo halo hodi hatutan joven uluk nia misaun ne’ebé hatudu ona, sira harii hela nasaun ne’ebé ohin ita hotu goza,” Xefe Governu hato’o mensajen liuhosi nota ne’ebé Agência TATOLI asesu, kinta ne’e.

Loron 12 novembru komemora kada tinan hodi hanoin hikas Juventude Loriku Asuwa’in ho determinante no nakonu ho espíritu luta nian, hamriik hakilar ba mundu katak ‘Mate ka Moris Ukun Rasik-an’,  no iha loron ne’e duni nakfila sai trajédia boot ‘Masakre Santa Cruz, ne’ebé joven feto no mane barak mak raan nakfakar no barak lakon to’o agora.

Nune’e, timor-oan tomak agradese tanba ho filmajem hosi Saudozu Max Stahl, ne’ebé konsege loke mundu nia matan kona-ba trajédia nakukun, ne’ebé ikus mai mundu internasionál preokupadu ba timor-oan nia sofrimentu hosi asaun brutalizmu forsa okupante nian.

Notísia relevante: Max Stahl nia obra jornalístiku influénsia komunidade internasionál

Aproveita loron ne’e, Xefe Ezekutivu hakarak apela ba joven sira, atu hadook-an hosi konflitu oioin, tanba joven monu ba kanek no mate, inan-aman mak sei sofre no lakon.

“Tanba ne’e, di’ak liu maka haka’as imi nia-an ba estudu, tanba mundu ohin loron kompetitivu, sé mak la badinas, la inovativu no la kreativu, nia sei hela iha kotuk. Ita-nia nasaun hamriik tinan 19 ona, nasaun ho tinan 19, seidauk bele fó satizfasaun ba ema hotu, tanba ita-nia Estadu iha nesesidade barak tebes, enkuantu rekursu ne’ebé ita iha la sufisiente atu atende hotu iha tempu badak de’it,” PM enkoraja.

Maski ho difikuldade oioin hanesan instabilidade polítika, resesaun ekonomia, COVID-19 no dezastre naturál, maibé PM garante povu no nasaun la lakon esperansa, tanba Governu sei kontinua halo esforsu kria kondisaun atu nasaun la’o nafatin ba oin.

“Governu ne’e lakohi husik timor-oan ida hela iha kotuk, tanba ne’e ha’u-nia oan joven sira-nia kontribuisaun importante tebes ba estabilidade nasaun. Ha’u dezeja Ksolok Loron Nasionál Juventude ba imi hotu. Viva Juventude Loriku Asuwa’in,” nia subliña.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here