Jornalista Max Stahl (hatais kalsa badak) ho nia kamera leno hela ba alvu. Imajen/Facebook: Kristy Sword Gusmão.

BOBONARO, 28 outubru 2021 (TATOLI) — Sobrevivente 12 Novembru 1991 hosi munisípiu Bobonaro, konsidera obra jornalístiku hosi Jornalista Inglaterra, Cristopher Wenner ‘Max Stahl’ konsege influénsia komunidade internasionál tau atensaun ba kauza Timor-Leste nian iha situasaun defísil.

Max Stahl ne’ebé konsege halo filmajen ba masakre 12 Novembru 1991 ne’e hakotu iis iha ospital Princess Alexandra, Brisbane, Austrália, tuku 04.00 madrugada, ohin, tanba kauza hosi moras kankru.

Sobrevivente 12 Novembru, Júlio Carvalho Caero, rona informasaun ne’e sente triste tebes tanba lakon Jornalista aten brani ne’ebé filma sira iha momentu hetan torturasaun hosi militár Indonézia.

“Ha’u reprezenta kolega sira 12 Novembru Bobonaro nian, hato’o sentidu kondolénsia kle’an ba família Max Stahl, nia obra jornalístiku konsege influénsia komunidade internasionál kona-ba torturasaun ne’ebé komete hosi rejime Indonézia nian. Obrigadu ba ita boot nia dedikasaun,” nia ko’alia iha Maliana, kinta ne’e.

Sobrevivente ne’e konsidera Max Stahl  nia obra jornalístiku konsege influénsia komunidade internasional nia atensaun, katak Timor-Leste hetan torturasaun hosi invasaun ilegál Indonézia.

“Jornalista ida-ne’ebé soe hela nia família tomak mai iha risku boot ida, hanesan filma masakre Santa Cruz, hatudu katak nia vontade no espíritu fó-sai informasaun rezisténsia povu Timor-Leste nian ba rai-li’ur,” nia katak.

Nune’e mós Mate-restu Caetano Soares Guterres, konsidera Max Stahl sakrifika  no dedika nia-an tomak ba Timor-Leste iha situasaun defísil.

“Ha’u sente lakon tebes ita-nia belun di’ak-ida, no hanoin tanba nia jornalista rai seluk ne’ebé brani tama iha inimigu ho forsa Indonézia sira, iha momentu ne’e nia tama iha ema tiru ami maibé nia konsege halo filmajen. Ida-ne’e nu’udar asaun ida-ne’ebé dalaruma ita Timor rasik mós la brani, maibé nia halo duni to’o ita bele hetan vitória,” nia hato’o

Nia hatutan, Max Stahl nia memoria, sai hanesan lembransa ida ba jerasaun foun sira atu banati tuir, tanba nia misaun mak fó vitória totál hodi hakotu funu naruk ne’ebé timór-oan sira sosa hodi ruin ho raan.

Notísia relevante: Parlamentu Nasionál sei hato’o votu pezár ba Max Stahl

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here