Kandidatu traballadór timor-oan ne’ebé partisipa teste matéria lian koreia, iha estádiu munisipál Dili, tersa (26/10). Imajen TATOLI/Francisco Sony

DILI, 26 outubru 2021 (TATOLI)—Sekretaria Estadu Formasaun Profisionál no Empregu (SEFOPE), iha tersa ne’e, halo abertura teste matéria lian koreia báziku ba kandidatu traballadór timor-oan hamutuk 5.492, ne’ebé atividade ne’e hahú ohin to’o loron 28 outubru.

Diretór Nasionál Empregu Exteriór SEFOPE, Filomeno Soares, hateten, atividade ne’e hanesan marka tan istória ida ba Timor-Leste atu hamenus númeru dezempregu.

Diretór Nasionál Empregu Exteriór SEFOPE, Filomeno Soares. Imajen TATOLI/Franciso Sony

“Durante surtu  COVID-19, SEFOPE la realiza atividade formasaun lian koreia tanba kumpre regra Organizasaun Mundiál Saúde, nune’e atividade ikus iha tinan 2019 no ohin kontinua fali halo teste ba kandidatu ne’ebé iha interese,” Diretór Nasionál hateten iha Estádiu munisipál Dili.

Notísia relevante: SEFOPE hahú halo rejistrasaun foun ba ezame lian korea

Filomeno Soares konsidera, formasaun hanesan oportunidade di’ak, ne’ebé kandidatu traballadór tuir teste ne’e hamutuk 5.492, kompostu hosi feto 842 no mane 4.650.

Kandidatu traballadór timor-oan ne’ebé partisipa teste matéria lian koreia, iha estádiu munisipál Dili, tersa (26/10). Imajen TATOLI/Francisco Sony

Biban ne’e, nia husu ba kandidatu traballadór ne’ebé tuir teste, tenke hatudu disiplina no tenke iha konsentrasaun hodi prienxe matéria, nune’e bele hetan oportunidade tanba kandidatu tuir teste ne’e ho númeru boot, maibé tuir meta SEFOPE simu kandidatu tuir formasaun hamutuk ema 2.500.

Governu ho kolaborasaun Korean Student Language Programme prepara matéria formasaun no rezultadu teste rasik sei fó sai sedu liu fulan ou semana dahuluk fulan-novembru 2021.

Nune’e, bainhihra rezultadu teste fó sai ona maka formasaun lian koreia sei hahú no bainhihra kursu hotu mak foin halo teste lian koreia ba traballadór sira atu ba serbisu.

Kandidatu traballadór timor-oan ne’ebé partisipa teste matéria lian koreia, iha estádiu munisipál Dili, tersa (26/10). Imajen TATOLI/Francisco Sony

Iha biban hanesan, kandidatu traballadór ne’ebé ohin tuir teste ne’e mai hosi munisípiu 12 inkui Rejiaun Administrativa Espesiál Oé-cusse Ambeno (RAEOA).

Iha fatin hanesan, kandidatu traballadór partisipa teste, Amandio da Costa, apresia tanba bele hetan oportunidade tuir teste.

“Ba ha’u atu manan ka lakon depende ba ita-nia esforsu, importante mak ita esforsu mak hanoin fali manan ka lakon,” nia hateten.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here