Juventude Lorico Asuwa’in ne’ebé sai vítima Masakre Santa Cruz 12 Novembru 1991, bainhira Militár Indonézia sira detein no haruka hasai faru ho isin-molik, iha Semitériu Santa Cruz. Imajen/Espesiál

DILI, 10 novembru 2021 (TATOLI)–Sobrevivente no eis Koordenadór Juventude Loriku Asuwa’in iha Masakre Santa Cruz hosi suku Bemori, Virgílio Pedro, husu Governu fó atensaun ba dezenvolvimentu nasionál liuhosi investe maka’as iha setór edukasaun, nune’e tulun jerasaun foun prepara-an.

Virgílio Pedro hamutuk ho ninia kolega joven na’in-18, iha loron 12 novembru 1991, afirma-an hodi partisipa iha asaun pasífiku, hahú hosi Igreja Motael to’o Semitériu Santa Cruz, ne’ebé ikus mai akontese situasaun krítiku no rezulta joven barak mak lakon vida.

“Ita iha esperansa boot ba joven sira hodi kontribui ba dezenvolvimentu hanesan rai seluk. Objetivu fó vida ba asaun pasífiku to’o akontese masakre tanba hakarak ukun rasik-an atu timor-oan bele kaer rasik kuda talin. Hafoin tinan 30 liu, ha’u hakarak haree país ne’e bele iha dezenvolvimentu nasionál ida, partidu ne’ebé de’it kaer ukun lidera governasaun durante períodu tinan-lima, importante maka bele dezenvolve setór edukasaun iha Timor-Leste,” Sobrevivente masakre hato’o mensajen ne’e ba Agência TATOLI, iha ninia rezidénsia Bemori, tersa ne’e.

Notísia relevante: Masakre Santa Cruz hanesan lisaun ida ba jerasaun foun sira

Virgílio Pedro dehan, nu’udar joven ne’ebé moris iha inimigu nia ukun momentu ne’ebá, ladún hetan oportunidade atu eskola, maski ikus mai konsege termina sekundária iha SMEA Becora.

“Ha’u uluk eskola hadau sorte de’it mak bele akaba sekundária ne’e, maibé ohin loron ita hetan ona liberdade, ne’ebé buat hotu la’o di’ak no laiha ameasa hosi ema seluk. Tanba ne’e, husu Governu tenke kria kondisaun atu jerasaun foun bele aproveita edukasaun ho di’ak, tanba juventude mak ita hotu nia esperansa boot atubele kontinua dezenvolvimentu iha rai-laran,” nia fó hanoin.

Iha sorin seluk, Sobrevivente Armindo Soares, enkoraja líder nasionál sira atu tuur hamutuk halibur ideia tanba úniku dalan ne’e maka bele rezolve problema hotu.

“Importante liu, líder sira buka malu hodi fó liman ba malu, nune’e bele lori dezenvolvimentu nasionál ba rai ne’e liuhosi investimentu iha setór edukasaun hodi aselera prosesu konstrusaun Estadu ba futuru ida di’ak liu,” nia fó hanoin.

Aleinde ne’e, nia mós preokupa ho edukasaun globál ne’ebé paradu, tanba ne’e nia konsidera problema edukasaun hanesan problema globál ne’ebé presiza país fó atensaun maka’as.

“Ita tenke prepara kondisaun atu labarik sira bele aproveita, tanba tempu to’o ona atu futuru nasaun iha sira-nia liman,” nia akresenta.

Nune’e mós, Sobrevivente Afonso da Cruz, konsidera, setór edukasaun importante tanba hanesan xave ba dezenvolvimentu nasionál.

“Edukasaun la haree de’it ba ema riku no ema boot sira-nia oan mak tenke asesu, maibé edukasaun tenke adekuadu atu povu kiik nia oan bele asesu,” nia subliña.

Nia dehan, kontribuisaun juventude loriku asuwa’in nia iha tinan 30 liubá la’ós atu hetan rekoñesimentu hosi Governu, maibé atu hetan futuru naroman hodi lori nasun ba ukun rasik-an atu timor-oan hotu bele eskola ho livre iha ninia rain rasik.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here