Juventude Lorico Asswa’in ne’ebé sai vítima, Amali no Levi, iha Masakre Santa Cruz 12 Novembru 1991. Imajen/Espesiál

DILI, 09 outubru 2021 (TATOLI)–Akadémiku no Poeta timor-oan, Vicente Paulino, hateten, komemorasaun Loron Masakre Santa Cruz iha loron 12 novembru kada tinan markante tebes ba joven foin-sae sira, tanba nu’udar parte ida hosi partisipasaun juventude ba ukun-rasik-an.

“Esperiénsia istóriku ko’alia mai ita katak luta ba ukun rasik-an hahú hosi tinan 1974 to’o 1999 no momentu ne’ebá iha joven barak envolve-an iha prosesu luta ba ukun rasik-an kontra okupasaun Indonézia, nune’e manifestasaun joven iha loron 12 novembru 1991 sai markante tebes, tanba joven barak mak mate,” Vicente Paulino hateten ba Agência TATOLI, tersa ne’e.

Notísia relevante: Masakre Santa Cruz hanesan lisaun ida ba jerasaun foun sira

Nune’e, iha dadus balun hatudu katak iha masakre ne’e, Militár Indonézia sira oho, hakanek no halakon joven sira kuaze 903. 

Iha sorin seluk, kada nasaun sempre fó atensaun ba luta no rezisténsia juventude, nune’e kada nasaun estabelese Loron Nasionál Juventude iha sira-nia istória konstrusaun Estadu demokrátiku.

“Masakre Santa Cruz hanesan akontesimentu istóriku ne’ebé loke mundu nia matan hodi fó atensaun maka’as ba problema Timor-Leste, ne’ebé ho razaun ne’e Governu hili no deside loron 12 novembru nu’udar Loron Nasionál Juventude timor-oan hodi valoriza no dignifika joven sira-nia espíritu patriotizmu ba libertasaun rai doben Timor-Leste,” nia akresenta.

Akadémiku ne’e nota mós katak istória funu Timor-Leste iha era ukun-an ne’e, kada ema iha obrigasaun morál hodi respeita loron ne’e no fó nafatin omenajen ba juventude loriku assuwa’in sira-nia memória. 

Relasiona ho tema komemorasaun Loron Masakre Santa Cruz ba tinan ne’e, Governu hili tema ‘Espíritu Assuwa’in 12 Novembru, Juventude sai Autór Importante ba Dezenvolvimentu Nasionál’, ne’ebé tuir nia tema ne’e interesante tebes tanba bele hafanu joven-sira hodi hateke fali ba espíritu eróiku juventude iha tempu pasadu, nune’e bele sai sasukat ba joven sira hodi bele envolve-an iha prosesu dezenvolvimentu nasionál. 

“Ba ha’u, hakarak tema ne’e sai realidade, entaun joven-sira tenke sai auto-independente ba moris pesoál, sosiál, no joven sira tenke sai kreativu iha artístika, kampu traballu, no sai fornesedór ideia ba polítika dezenvolvimentu nasionál,” nia tenik.

Joven hola parte sai autór importante dezenvolvimentu nasionál

Aleinde ne’e, bainhira juventude mak sai autór importante ba dezenvolvimentu nasionál, entaun juventude ne’e rasik iha obrigasaun morál hodi valoriza no dignifika maluk joven eroi sira ho asaun konkreta hanesan envolve-an iha misaun solidariedade sosiál no hasees-an hosi aktu krime ka hahalok a’at sira. 

“Ha’u haree joven barak mak hola parte hosi konseitu autór importante ba dezenvolvimentu nasionál tanba joven sira balun hahú kria rasik ona kampu traballu hodi fó servisu ba nia maluk seluk ka maluk timor-oan balun, ne’ebé iha dimensaun ida-ne’e ita hanaran kriasaun kampu traballu ho inisiativa rasik. Ida-ne’e hatudu katak joven sira ho matenek no talentu ne’ebé mak iha hakarak duni atu dezenvolve rai ida-ne’e,” nia subliña.

Joven-sira barak mak hahú dedika-an ba iha servisu jornalístiku no iha servisu edukasaun nu’udar manorin, ba servisu defeza no seguransa, servisu saúde no setór seluk, ne’ebé hatudu katak joven sira sai duni autór ba dezenvolvimentu nasionál Timor-Leste.

Maibé iha aspeitu balun maka partisipasaun ne’e seidauk máximu tanba kestaun polítika partidária, ne’ebé predominante liu no implika ba juventude nia partisipasaun ne’ebé hamihiis ba konseitu juventude mak autór ba dezenvolvimentu nasionál.

“Ha’u-nia mensajen ba joven sira tempu to’o ona atu ida-idak husu ba nia-an, nasaun sé nian, ha’u-nia espíritu nasionalizmu ne’e iha ne’ebé? fundamentál liu mak joven sira tenke banati tuir saída mak John F. Kennedy dehan labele husu ba nasaun saída mak nasaun halo ba ó, maibé husu ba ó nia-an saida mak ó halo ba nasaun,” Poeta ne’e dehan. 

Governu presiza kria kampu traballu ba joven-sira

Iha parte seluk, Timor-Leste hetan ona ninia indepedénsia tinan barak ona, maibé númeru dezempregu sei barak no Governu tenke iha hanoin kria kampu traballu ba joven-sira, nune’e hamenus númeru dezempregu.

“Ita agradese tanba nasaun balun fó oportunidade ba ita-nia joven sira bele ba serbisu, maibé ita rasik tenke iha hanoin atu loke kampu traballu tanba Juventude mak autór ba dezenvolvimentu nasionál, tanba ne’e Governu tenke fó atensaun ba sira atu komesa aposta no fó konfiansa ba joven sira ne’ebé iha kapasidade, talentu, kreatividade, hodi nune’e bele dezenvolve-an ho responsabilidade ba serbisu ne’ebé sira simu atu,” Poeta timor-oan, Vicente Paulino dehan.

Maibé realidade, ida-ne’e la akontese tanba parte balun sei aposta ba sira-nia rekursu partidáriu, ne’ebé hamosu dezigualdade sosiál no aumenta tan númeru joven sira ne’ebé dezempregadu. 

“Tenke rekoñese katak joven-sira dezempregadu iha ita-nia rai barak tebes, tanba kauza hosi situasaun falta kampu traballu, ne’ebé antes ne’e promete. Tanba ne’e hatudu katak Governu haluha promesa, falta apoiu máximu ba joven kreativu sira ne’ebé talentozu, atu kria rasik sira-nia kampu traballu, falta apoiu ba joven emprezáriu sira hodi dezenvolve sira-nia negósiu, ida-ne’e bele implika iha disponibilizasaun vaga servisu nian ba joven sira seluk,” nia dehan.

Tanba ne’e, nia Akadémiku ne’e husu Governu fó apoiu orsamentu ba joven kreativu, kapasitadu no talentozu, ne’ebé mak hakarak kria negósiu rasik hodi fó servisu ba maluk joven sira seluk.

“Tenke kria kampu traballu iha setór oioin, hodi nune’e bele hamenus joven dezempregadu iha ita-nia rai, tenke fó suporta másimu ba emprezáriu timor-oan iha dezenvolvimentu negósiu hodi fó sustentabilidade ekonómika ba país ne’e,” nia hateten. 

Aleinde ne’e, aselera dezenvolvimentu iha grande projetu hanesan iha área edukasaun, turizmu, no infraestrutura, ne’ebé bele fó servisu ba ema barak, partikularmente joven sira.

“Ha’u-nia mensajen ba Governu mak ukun ne’e ba sé, sé ba povu, tenke ukun ho fuan no domin, fó atensaun ba povu sira-nia halerik no preokupasaun, tanba to’o agora ita-nia joven barak mak sei moris ho situasaun ne’ebé la favorável,” nia subliña.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here