Ministru Kombatente Libertasaun Nasionál, Julio Sarmento da Costa "Meta Malik". Imajen Tatoli/Francisco Sony.

DILI, 09 novembru 2021 (TATOLI)—Ministéiru Asuntu Kombatente Libertasaun Nasionál (MAKLN), selesiona kompañia Bobolait Unipesoál Lda sai vensedór ba projetu konstrusaun monumentu masakre 12 Novembru iha semitéiru Santa Krus no sei hatuur fatuk dahuluk iha selebrasaun masakre 12 novembru 2021.

Notísia Relevante: PR Lú Olo husu Governu kumpre promesa harii Monumentu 12 Novembru

“Konkursu manan hosi komapañia Bobolai ne’ebé tenderizasaun asina iha fulan rua liu-ba ninia prosesu kontratu liu hotu ona agora iha komapañia nia liman. Projetu ne’e dalaruma iha konbinasaun kompañia ho Komite 12 Novembru, nune’e sei hatur fatuk dahuluk iha selebrasaun masakre 12 novembru ba dala-XXX iha 12 novembru 2021,” Ministéiru ba Asuntu Kombatente Libertasaun Nasionál (MAKLN), Julio Sarmento da Costa ‘Meta Malik’, hateten ba Agência Tatoli iha Parlamentu Nasionál, tersa ne’e.

Orsamentu ba obra ne’e gasta millaun $1-resin no tuir planu prazu ezekusaun projetu konstrusaun monuumentu 12 Novembru ne’e sei la’o durante tinan ida-nia laran.

Parte ministéiru rasik kria ona ekipa ida hamutuk ho Konsellu Administrasaun Fundu Infraestrutura (KAFI), Komite 12 Novembru atu bele halo kontrolu ba kompañia ne’ebé hala’o servisu hodi konstrui monumentu 12 Novembru ne’e

Governante ne’e klarifika, kona-ba monumentu 12 Novembru ne’ebé harii ona iha jardin Motael, tuir loloos monumentu refere ba saudozu Sebastião Gomes nian tanba saudozu mate iha igreja Motael.

“Maibé, konstrusaun harii ona iha ne’ebá seida’uk inaugural. Tanba ne’e, ami tetu hela sei inaugura no labele hakerek iha ne’eba 12 Novembru no bele tau iha falesidu saudozu Sebastião nia naran,” nia hateten.

Tanba ne’e, ministéiru sei hamutuk reuni ho Komité 12 Novembru hodi fó solusaun kona-ba monument 12 Novembru maibé daudaun ne’e seida’uk ko’alia to’o iha ne’ebá.

Antes ne’e, Komité 12 Novembru hamutuk ho ekipa hosi Ministériu Asuntu Kombatente Libertasaun Nasionál (MAKLN) hala’o sorumutu ida ho Centro Nacional Chega (CNC) hodi aprenzenta dezeñu kona-ba kontrusaun monumentu memoriál 12 novembru no reabilitasaun moru semitériu Santa-Cruz Dili.

Prezidente Komité 12 Novembru, Gregório Saldanha hateten sorumutu ne’e atu hametin liña koordenasaun no kooperasaun servisu entre instuisaun hirak ne’e, nune’e bele akompaña prosesu implementasaun projetu ne’e to’o ramata ho susesu.

Dezeñu no orsamentu

Oinsá kona-ba dezeñu, antes ne’e Meta Malik hatán, dezeñu ne’e kontinua de’it dezenu ne’ebé mak Kay Rala Xanana Gusmão nia tempu prepara ona. Agora, hein atu hala’o de’it ona maibé husu nafatin ba Komité 12 Novembru atu bele kontribui másimu hodi bele realiza ona duké dada-malu no defísil atu hala’o.

Nia hatutan, Komité 12 Novembru konkorda ona maibé téknikamente mak sei prosesu hela tanba obra mak Ministériu Asuntu Kombatente Libertasaun Nasionál (MAKLN) nian maibé orsamentu ne’e mai hosi Komité 12 Novembru.

Meta Malik hateten, tenke kontribui katak tenke rona malu no halo konkordánsia ho dezenu ne’ebé mak iha no téknikamente presiza Comité 12 Novembru nia kontribuisaun mós tanba Comite 12 Novembru mak sai autór iha momentu ne’ebá.

“Obra ne’e, Estadu mak halo maibé konsidera katak sira rasik mak hahú. Nune’e, atu bele identifika loron ne’e sei sai loron importante ba loriku asswa’in iha rai doben ida-ne’e, Komite 12 Novembru mós tenke involve planu konstrusaun hamutuk ho Governu no kompañia, nune’e iha buat balun sala bele kurije malu, labele halo ulun toos depois la konsege halo,” nia dehan.

Konsellu Administrasaun Fundu Infraestrutura (KAFI) husu kompañia ho MAKLN hamutuk hodi hala’o konstrusaun no sira husu atu MAKLN sai konsultan maibé MAKLN la prevee osan ba konsultan nian.

Tuir nia, konstrusaun Monumentu 12 Novembru servisu hamutuk ho MAKLN no Komisaun Nasionál Aprovizionamentu (CNA).

Entretantu, osan ne’ebé mak Governu gastu ba konstrusaun Jardin 12 Novembru Motael ho montante $95,000 ho empreza ALGIS Constraction Lda.

Iha tinan 2010, Governu Aliansa Maiória Parlamentár (AMP) inisía atu harii Monumentu 12 Novembru ne’ebé atu estabelese iha Semitériu Santa Cruz nia oin. Tanba ne’e Governu propoin orsamentu ho montante $500,000 iha polítika Orsamentu Jerál Estadu (OJE) tinan fiskál 2011 nian atu ba nesesidade dezeñu ho estudu viabilidade ne’ebé hetan aprovasaun iha Parlamentu Nasionál.

Monumentu ne’ebé atu fó onra ba sakrifísiu juventude loriku asswa’in ne’ebé mate iha masakre 12 Novembru 1991 iha semitériu Santa Cruz to’o agora seidauk bele estabelese, tanba Eis Primeiru-Ministru, Kay Rala Xanana Gusmão la konkorda ho Monumentu 12 Novembru ninia dezeñu ne’e tanba ladún iha valor artístiku.

Iha 18 outubru 2010, liuhosi konferénsia imprensa, Ministériu Solidariedade Sosiál (MSS) hamutuk ho ekipa ida-ne’ebé kompostu hosi Sekretaria Estadu Asuntu Antigu Kombatente Libertasaun Nasionál (SEAAKLN) no Comité 12 Novembru, anunsia abertura konkursu ida ba dezeñu di’ak-liu kona-ba monumentu nasionál Masakre 12 Novembru 1991 nian ne’ebé atu haríi iha rate Santa Cruz.

Prezidente Comité 12 Novembru, Gregório Saldanha, hateten dezeñu ne’e tenke hakonu kritériu sira hanesan dezeñu tenke iha valór istóriku, kulturál no relijiozu; tenke reflete mós espíritu asswa’in, patriotizmu, nasionalizmu juventude sira-nian iha tempu ne’ebá; tenke iha ekilíbriu entre arkitetura tradisionál no arkitetura moderna; tenke iha vizaun artístika iha parte arkitetónika nian, kona-ba ordenasaun espasu hodi haree ho aspetu jeográfiku no istóriku, liuliu kona-ba akontesimentu 12 Novembru 1991.

Kritériu seluk mak tenke iha valór edukativu no turístiku, asegura utilizasaun símbolu rezisténsia nasionál nian ne’ebé mak juventude Lorico Asswa’in sira utiliza iha tempu ne’ebá no ikusliu, atu hatete de’it katak laiha restrisaun relasiona ho tipu meteriál konstrusaun ne’ebé atu utiliza.

Hosi konkursu refere dezeñu sanulu ne’ebé di’ak sei hetan prémiu tuir klasifikasaun mak hanesan ba manan-na’in hetan prémiu $10.000, ba segundu klasifikadu prémiu ida $4.000, ba terseiru klasifikadu $3.000, kuartu klasifikadu $2.000 no sira seluk na’in neen (6i) da-ida $1.500.

Notísia Relevante: Comité 12 Novembru aprezenta dezeñu  konstrusaun monumentu 12 novembru ba CNC

Jornalista : Nelson de Sousa

 Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here