Prezidente Repúblika, Francisco Guterres Lú Olo. Imajen TATOLI/ António Gonçalves

DILI, 12 Novembru 2020 (TATOLI)–Prezidente Repúblika, Fransisco Guterres ‘Lú Olo’, husu ba lider politiku ne’ebé kaer ukun iha Governu atu realiza sira-nia kompromisu polítika hodi harii hikas Monumentu 12 Novembru ne’ebé lansa tiha ona to’o agora seidauk realiza.

Notísia Relevante: Timor-Leste nia forsa boot mak juventude

“Prezidente Repúblika simu rekomendasaun hosi Prezidente Comite 12 Novembru (C12N), Gregorio Saldanha. Ha’u hakarak bahadak de’it katak rekomendasaun ne’e iha aspeitu ida husu lider sira país ne’e nian halo reflesaun, iha kontestu ida rejiliénsia ne’ebé sai hanesan tema sentrál ba loron ohin nian. Rua, atu husu ba orgaun soberanu sira liuliu sira-ne’ebé iha kompeténsia para bele kumpre sira-nia kompromisu ba joven sira 12 Novembru nian ne’ebé hato’o kedas iha tempu uluk. Prezidente Repúblika rejistu nafatin saida mak prezidente Comite 12 Novembru hatoo mai,” dehan Prezidente Lú Olo liuhosi deskursu ba selebrasaun Masakre Santa Crus ba dala-29 no loron Nasional Juventude ba dala-15 iha Semitériu Santa Cruz, Dili, kinta ne’e.

Prezidente Repúblika hateten, loron 12 novembru 1991 nu’udar loron juventude Lorico Asswa’in liu atus-rua lakon sira-nia vida iha Masakre Santa Cruz ho espíritu nasionalista no domin ba TL no povu ne’ebé joven-sira see aan ba mate hodi defende TL nia independénsia.

“Ha’u-nia hako’ak boot! Imi-nia aman-inan, oan, maun, bin, alin sira-ne’ebé imi lakon, tanba tuir manifestasaun 12 novembru, hatudu duni ba mundu tomak, iha momentu ne’ebá katak povu Timor-Leste tomak hamriik organizadu no determinadu nafatin atu ukun rasik aan,” Xefe Estadu hateten.

Nia hateten, povu Timor-Leste labele haluha Timor nia belun sira hosi nasaun sira seluk ne’ebé ho brani, filma masakre 12 de novembru no lori-sai filme ba rai-li’ur hodi habelar ba komunidade internasional kona-ba TL nia luta libertasaun nasionál.

“Ha’u refere ba repórter no jornalista internasionál sira, hanesan Max Stahl, Saskia Kouwemberg, Russel Anderson, Amy Goodman no Allan Nairn, ha’u hato’o ha’u-nia sentida omenájen mós ba Kamal Bamadhaj, belun foin-sa’e ida, estudante hosi Nova Zelândia ne’ebé lakon mós nia vida tanba brani marxa ho ita-nia foin-sa’e sira ba ita-nia liberdade,” nia dehan.

TL nia luta, nia hateten, kleur loos tanba lahetan apoiu maka’as hosi maioria komunidade internasional tanba durante tempu naruk Timor-Leste nia odomatan taka metin ba ema rai seluk tama mai Timor-Leste. Maibé, ikus mai tanba haree filme Masakre Santa Cruz, komunidade internasional tomak hamriik kedas no TL nia istória luta hahú faze foun.

Xefe Estadu haktuir, juventude hatudu domin, dedikasaun no barani iha tempu luta libertasaun nasionál no tenke hatutan nafatin valór sira-ne’e, atu hasoru dezafiu ne’ebé de’it iha tempu ukun aan. Juventude Lorico Aaswa’in oan-doben Timor-Leste nian, Timor-Leste hanesan país joven ida no país joven sira-nian katak maioria populasaun iha idade 35 ba kraik.

Realidade, nia dehan, demográfika ida-ne’e hatudu katak joven sira forsa boot no importante iha timoroan nia rain, nune’e juventude Lorico Asawa’in iha knaar importante oioin atu hala’o iha prosesu dezenvolvimentu nasionál.

“Joven sira bele dezenvolve sira-nia rain atu sai di’ak. Maibé dezempregu aas tebes maioria joven sira labele servisu tanba laiha servisu. Servisu iha rai-liur la’ós solusaun di’ak liu atu rezolve problema dezempregu iha rai laran. Situasaun ida-ne’e hori uluk kedas ho ninia kauza rasik. Governu tenke kria kondisaun atu hamosu empregu iha rai-laran, iha territóriu tomak,” nia hateten.

Tuir PR, Estadu tomak liuliu Governu iha obrigasaun atu buka identifika no koloka joven sira iha área oioin tuir sira-nia kapasidade. Governu tenke fasilita joven sira hodi sira bele envolve aan iha TL nia prosesu dezenvolvimentu.

Ba kestaun ne’e, nia dehan, Governu mesak de’it la to’o maibé Governu hala’o ninia parte no joven sira mós tenke hala’o sira-nia parte. Tuir nia, Governu nia esforsu ho joven sira-nia inisiativa no servisu presiza hasoru malu iha pontu ida no kompleta malu tanba hamutuk mak lori timoroan bele hakaat ba oin no atinje objetivu ba dezenvolvimentu nasionál.

Iha okaziaun ida-ne’e, Prezidente Repúblika apela ba ema hotu katak joven 12 novembru no joven sira hotu, hodi hanoin atu diskute no debate hamutuk halo nusá bele transforma Timor-Leste nia sosiedade.

Amali no Leví Eroi Ba Joventude

Entretantu, PR Lú Olo louva ho espíritu solidaridade ne’ebé sobrevivente Masakre Santa Crus, Filomeno Marques “Amali” no Leví de Araujo Bukar, ne’ebé nunka soe malu mezmu inimigu tiru kanek Leví maibé Amali hakuak metin Leví, no sira rua sai joven ezemplar no joven eroi ba juventude Timor-Leste.

Prezidente haksolok ho joven sira-nia inisiativa oioin, sira-nia determinasaun no dedikasaun atu dezenvolve rai Timór. Sira ne’ebé mai hosi jerasaun joven, sobrevivente hosi masakre 12 Novembru no joven sira ohin loron nian, ne’ebé hatudu sira-nia espíritu solidariedade iha tempu luta, ohin loron hatudu mós sira-nia matenek no dedikasaun atu serbí sira-nia maluk joven seluk no ita-nia sosiedade tomak.

“Ezemplu ida mak Sérgio Filomeno Marques ka Amali, sobrevivente hosi Masakre Santa Crús ne’ebé iha momentu ne’ebá, hatudu ninia aten-barani no solidariedade boot ba ninia maluk joven seluk. Amali ohin loron sai símbolu ida Massakre 12 Novembru nian tanba iha momentu defísil loos, enkuantu kilat tarutu iha nia sorsorin no fó ameasa ba nia vida rasik, nia latauk no lahanoin atu halai maibé nia tuur kous nia maluk joven ida seluk ne’ebé kanek todan.

Bainhira ita rona iha vídeo ne’ebé belun Max Sthal hasai, Leví hakilar tanba sente moras ho nia kanek sira, no hatudu hanesan nia atu lakon esperansa, Amali fó korajen ba Leví, konsola nia katak buat hotu sei di’ak, fó korajen ba Leví atu kontinua persiste. Hanesan fali atu fó mensajen ba Leví labele lakon esperansa tanba Timor-Leste atu ukun rasik an ona! Amali rasik sei iha forsa atu salva nia aan, maibé nia deside hela ho Leví maski nia hatene konsekuénsia ne’ebé nia sei simu bainhira militár indonéziu kaer nia. Amali ho Leví sobrevive masakre ida-ne’e,” PR agradse.

Tinan 29 liu tiha, Amali la tuur hikar liman haree joven sira no ninia maluk Timoroan sira seluk no ohin loron Amali kontinua halo servisu hanesan Sekretáriu Jeral Komité 12 Novembru, tau matan no presta servisu ba ninia maluk sobrevivente sira seluk husi 12 Novembru. Se tinan 29 liubá Amali konsege tulun Leví, ohin loron Amali halo servisu atu kontinua halo buat ruma ba maluk sira, sobrevivente sira no mós ba sira ne’ebé mate no sira-nia família.

La’ós ida ne’e de’it, Amali ohin loron hala’o knaar nu’udar jestor ba Sentru Juventude Becora, sentru ne’ebé presta servisu importante lubuk ida ba joven sira ohin loron hahú hosi formasaun ba abilidade moris nian, formasaun língua oioin no komputador to’o fasilita joven sira hatudu sira-nia talentu no kapasidade iha área oioin.

Louva Inisiativa Joven Luciano Transforma Tasi-Been Sai Bee-Moos

Iha biban hanesan, PR Lú Olo mós louva joven Luciano dos Santos, ho tinan 26, finalista Departamentu Kímika, Universidade Nasional Timor Lorosa’e (UNTL) nian, ne’ebé hosi ninia peskiza akadémika bele transforma tasi-been sai bee-moos.

Luciano nia mehi ida ne’e hahú iha UNTL no nia lori filafali ba nia Aldeia Raimé, Suku Vatuvou, Postu Administrativu Maubara. Luciano lori tinan tolu (3), hahú hosi tinan-2017 to’o tinan-2019 atu konsege realiza duni ninia mehi liuhosi determinasaun no servisu makaas hamutuk ho ninia kolega lubuk oan ida.

Iha tinan-2018, Luciano ho ninia maluk joven sira seluk, Olívio no Clotilde Nunes, harii grupu kooperativa ida hanaran “Nurak Sulin Hamutuk” ne’ebé kompostu hosi ema na’in-ualu (8) atu hala’o servisu ida-ne’e. Entre sira nain-ualu (8) ne’e, Luciano ho nia kolega ida de’it mak estuda iha universidade.

Iha tinan-2019 mak sira konsege transforma tasi-been sai bee-moos. Luciano ho nia kolega sira konsege realiza ida-ne’e ho sira-nia esforsu no rekursu rasik, lahetan tulun hosi Estadu ka entidade privadu ruma.

Iha tinan-2020, kooperativa ida-ne’e nia membru sai ema na’in025 no sira transforma tasi-been sai bee-hemu. Ohin loron, sira fornese bee sira-ne’e ba kioske no loja sira iha Postu Liquiçá no Postu Maubara.

Prezidente Repúblika louva no apresia sira-nia kapasidade no vizaun empreendedora nu’udar ezemplu di’ak ida ba juventude tomak. Sira-nia moris inspira konfiansa no esperansa ba Timor-Leste.

Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here