Labarik feto ida kous nia alin no halimar iha baraka lona nia oin ne’ebé sai hanesan uma provizoriu ba nia. Tanba impaktu hosi inundasaun 4 Abril 2021. Iha Manleu, tersa (07/09). Imajen Tatoli/Francisco Sony

DILI, 08 novembru 2021 (TATOLI)— Governu liuhosi Sekretária Estadu Protesaun Sivíl (SEPS), apoia ona lona foun ba família vítima dezastre naturál hamutuk 135 ne’ebé daudaun kontinua hela iha sentru akollamentu iha kapitál Dili.

“Ita fahe lona ka tenda foun ba xefe família 135 no  mós fó apoia nesesidade bázika hanesan alimetasaun no bee-moos ba família sira iha sentru akollamentu iha kapitál Dili,” Diretór Jerál SEPS, Ismael Babo, hateten ba Agência TATOLI iha knaar fatin-Caicoli, segunda ne’e.

Notisia Relevante: Lona sai mahon ba vítima inundasaun iha Manleuana hahú nakles

Totál Família vítima inundasaun 4 abríl hamutuk 135 ne’e daudaun hela iha sentru akollamentu Dom Bosco Comoro hamutuk uma-kain 35, Kapela Hera hamutuk 11, Manleuna 44 no Metiaut 37.  

Tuir nia, SEPS hakarak re-aloka uma-kain hirak ne’e ba fatin dignu, maibé iha Dili ne’e rai maka sai problema.

“Ita tenta buka fatin ba sira, tanba atu re-aloka ba hela fatin uluk la permite tanba fatin risku. Ita husu sira kuandu sira buka fatin rasik sei apoia material,”nia dehan.

Kona-ba alojamentu temporáriu, Diretór ne’e dehan Governu liuhosi Konsellu Ministru aprova ona planu atu halo, maibé ida ne’e kompetesia Ministériu Planu no Ordenamentu nian.

“Ami nia ekipa envolve ona hodi ko’alia kona-ba asuntu ne’e, maibé programa ne’e resposabiliza hosi Ministru Planu no Ordenamentu nian”, dehan Nia.

Iha sorin seluk,Vítima inundasaun iha sentru akollamentu Manleuana, Lorenço Taek, informa sira nia parte simu ona lona foun hosi Governu.

“Ami simu ona lona foun no ai- han sira iha fulan kotuk,” Lorenço agradese.

Nia dehan, maski simu ona apoia, maibé husu Governua atu muda ona sira hosi fatin ne’e tanba la aguenta ona hela iha lona okos.

“Ami ejize ba Governu lori ami sai ona husi fatin ida ne’e, tanba tempu udan ne’e bee tama de’it ami nia lona laran,” nia preokupa.

Antes ne’e, Governu planeia ona fatin implemneta sentru akollamentu multifunsaun ba vítima inundasaun iha Manleuana no Metinaro.

Hafoin inundasaun iha loron 04 abríl 2021, ema hamutuk na’in-34 mak mate no na’in-14 maka lakon iha nivél nasionál, família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili no uma hamutuk 4.231 mak hetan estragu totál.

Notisia Relevante: Governu kontinua tau importánsia ba vítima dezastre naturál

Jornalista : Natalino Costa

Editór       :  Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here