Enkontu koordenasaun SEJD no autoridade Viqueque iha sala reuniaun Administrasaun Viqueque, segunda (08/11). Imajen TATOLI/Vitorino Lopes da Costa

VIQUEQUE, 08 novembru 2021 (TATOLI)–Ekipa hosi Sekretaria Estadu Juventude no Desportu (SEJD) hahú halo koordenasaun ho autoridade lokál ba implementasaun jogu desportivu komunitáriu iha ámbitu komemorasaun loron Proklamasaun Independénsia ba dala-46 iha loron 28 novembru.

“Ohin ami halo koordenasaun ho Administradór munisípiu Viqueque no Administradór postu lima kona-ba planu SEJD atu implementa jogu komunitáriu iha kada postu,” Reprezentante Asesór SEJD, Ananias Pinto, hateten ba Agência TATOLI hafoin ramata enkontru iha sala reuniaun Administrasaun Viqueque, segunda ne’e.

Notísia relevante: Loron Proklamasaun Independénsia tinan ne’e sei selebra iha Baucau

Sekretaria Estadu halo koordenasaun atu halo estimasaun orsamentu ba atividade loron nasionál iha kada postu, nune’e bele iha prepasaun di’ak, hafoin sei haruka ba Sentru Juventude Viqueque no ikus liu ba SEJD.

“SEJD delega ami ba iha munisípiu hotu hodi ami aprezenta termu referénsia kona-ba implementasaun desportu komunitáriu. Tanba ita-nia planu realiza jogu iha postu hotu iha Timor Leste. Tanba ne’e, ami halo aprezentasaun mekanizmu implementasaun,” nia akresenta.

Administradór munisípiu mak sei sai Komité Orientadór no Administradór postu sai Prezidente Komisaun ba implementasaun atividade.

Iha biban hanesan, Administradór munisípiu Viqueque, Januário Soares ‘Boly’, husu administradór postu lima hodi kria komisaun hodi realiza desportu komunitáriu iha ida-idak ninia postu.

“Ita sei kria komisaun ba desportu komunitáriu iha postu lima, tanba ne’e ita presiza aselera preparasaun tanba SEJD maka prevee fundu hodi realiza eventu,” nia akresenta.

Nune’e mós, Diretór Sentru Juventude Viqueque, Luís Sarmento, hateten, orsamentu ba jogu desportivu komunitáriu sei transfere ba konta bankária kada postu.

“Ami sei halo verifikasaun ba planu orsamentu sira ne’ebé kada postu lima halo no haruka mai ami. Ami sei haree proposta sira ne’e razoável ka lae, tanba ne’e ami sei haree didi’ak, dahuluk ami mak halo preparasaun proposta hodi submete ba SEJD,” nia dehan.

Tuir planu atividade ba komemorasaun loron nasionál ne’e sei hahú iha loron 12 novembru no ramata iha 28 novembru 2021.

Atividade desportiva ne’ebé sei realiza maka futebol sub-11, volleyból, atletizmu no seluk tan.

Alokasaun orsamentu ba atividade jogu desportivu komunitáriu iha Viqueque hamutuk $29.204, kompostu hosi iha postu Lacluta $4.156, Ossu $6.790, Uatucarbau $5.434, Uatulari $5.434, Viqueque villa $6.790.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here