Ekipa Komisaun Organizadora nasionál no munisipál hala’o enkontru konjunta atu ajusta planu atividade no orsamentu ba selebrasaun loron Proklamasaun Independensia ba dala-46 iha loron 28 novembru, iha salaun apuramentu munisipál, Villa nova, Baucau, tersa (21/09). Imajen TATOLI/Natalino Belo

BAUCAU, 21 setembru 2021 (TATOLI)—Komisaun Organizadora deside ona loron Proklamasaun Independénsia ba dala-46, iha loron 28 novembru iha tinan ne’e, sei selebra iha aldeia Darsula, suku Gariuai, postu Baucau villa, munisípiu Baucau, tanba ne’e, entidade kompetente halo enkontru atu ajusta ho programa, atividade, no orsamentu.

“Enkontru ne’e hanesan parte ida preparasaun ba komemorasaun loron Proklamasaun Independénsia ne’ebé sei realiza iha Baucau, nune’e komisaun hosi munisípiu hotu hamutuk atu ajusta planu programa inklui orsamentu ne’ebé utiliza iha selebrasaun,” Diretór Jerál Desentralizasaun Administrativa hosi Ministériu Administrasaun Estatál (MAE) no atuál Sekretáriu Jerál Komisaun Organizadora, Belarmino Neves, hateten, iha salaun apuramentu munisipál, Villa nova, tersa ne’e.

Liuhosi enkontru preparasaun ne’e, Komisaun Organizadora nasionál no munisipál tuur hamutuk atu ajusta atividade no planu orsamentu, nune’e bele fahe serbisu ba munisípiu tuir kbiit.

Aleinde ne’e, Ministru Administrasaun Estatál no atuál Prezidente Komisaun Organizadora, Miguel Pereira, orienta atu entrega sebvisu balun ba munisípiu, tanba ne’e autoridade munisipál sira buka koordena malu.

“Ita tenke fó ona tempu ba maluk autoridade lokál sira atu jere rasik ninia serbisu hodi banati tuir kapasidade ne’ebé sira iha,” nia akresenta.

Planu atividade no orsamentu hosi munisípiu sei intrega ba nasionál atu ajusta hamutuk molok aprova no halo levantamentu fundu.

Iha fatin hanesan, Prezidente Admistrasaun Munisipál (PAM) Baucau, Olívio ‘Bou-Lesa’ Freitas, hateten, Baucau-oan tenki serbisu hamutuk hodi fó susesu ba komemorasaun loron Proklamasaun Independénsia.

“Ita hakarak selebrasaun 28 novembru susesu iha Baucau, ha’u iha sujestaun atu iha espozisaun atu harame selebrasaun no hala’o fulan ida antes, bele iha outubru hahú hala’o ona,” nia hatutan.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here