Ekipa médiku sira Vasina Pfizer Covid-19 ba estudante Kristal, kinta 5/11/2021.Imajen Tatoli/Antonio Goncalves

DILI, 5 novembru   2021 (TATOLI)—Sala Situasaun, Sentru Integradu Jestaun Krize (CIGC, sigla portugés) relata, ohin (05/11), kazu detetadu foun na’in-ida, rekuperadu sia no ativu ualu.

”Kazu detetadu foun na’in-ida, hosi Dili, munisípiu seluk laiha,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi nota ne’ebé Agência TATOLI asesu, sesta ne’e.

Notísia Relevante: Vasina Pfizer doze dahuluk atinje ona 3.8%

Nune’e, hahú 21 marsu 2020 to’o 5 novembru 2021 iha kumulativu kazu konfirmadu 19.795, kumulativu rekuperadu 19.665 no kumulativu óbitu 122.

Hosi horisehik mai ohin, Laboratóriu Nasionál Saúde halo teste PCR 56, kompostu vijilánsia sentinela rua, rastreiu ba kontaktu tolu, rastreiu aleatóriu 29, viájen internasionál na’in-19, follow up iha kuarentena na’in-tolu.

Alende ne’e, totál teste PCR ne’ebé halo iha 4 novembru iha munisípiu-sira seluk, Rejiaun Administravu Espesiál Oé-Cusse no Ambeno (RAEOA) no Hospitál Nasionál Guido Valadares (HNGV) 101, kompostu, Maubisse 12, Maliana 31, Viqueque laiha, Suai na’in-haat, Baucau 48, Ermera laiha, RAEOA laiha, HNGV laiha, Lautém laiha, Vera Cruz na’in- neen.

Populasaun elijível tinan 18 ba leten, ne’ebé simu ona vasina to’o iha loron 5 novembru, tuir sistema informasaun Saúde iha Ministériu Saúde, hanesan kumulativu 1ª doze iha Dili (82,7%) no kumulativu 2ª doze iha Dili (73,8%).

Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 74,7% no simu ona doze daruak 48,8%.

Hosi insidénsia COVID-19 iha Timor-Leste, durante loron hitu ikus maka 0,1/100 mil abitante, enkuantu ba deit munisípiu Dili 0,2/100 mil abitante.

Iha loron 5 novembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu ospitalizadu ba kazu detetadu pozitivu na’in-tolu, moderadu na’in-ida no kaman na’in-rua.

Apelu

CIGC apela ba populasaun iha Dili laran no mós iha Munisipiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka kakorok moras, ka inus-been, ka mear, hodi bele hetan atendimentu husi profisionál saúde sira.

Nune’e mós husu ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras Covid-19 da’et ba mai.

Regra sira ne’e, hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak no hamri’ik ka tur do’ok husi ema seluk mínimu metru ida ho balun.

Notísia Relevante: COVID-19: kazu detetadu foun haat no ativu 16

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here